Innlent

Ríflega helmingi færri ný smit í dag en í gær

Kjartan Kjartansson og Kolbeinn Tumi Daðason skrifa
Mikið álag er nú á heilbrigðiskerfinu vegna kórónuveirufaraldursins sem geisar. Myndin er úr safni.
Mikið álag er nú á heilbrigðiskerfinu vegna kórónuveirufaraldursins sem geisar. Myndin er úr safni. Vísir/Vilhelm

Staðfest smit nýs afbrigðis kórónuveiru sem veldur COVID-19-sjúkdómnum eru nú alls 1.364 hér á landi. Þeim hefur fjölgað um 45 frá því að síðustu tölur birtust á covid.is klukkan eitt í gær en þá var greint frá meira en tvöfalt fleiri smitum. Þó virðist sem að hátt í helmingi færri sýni hafi verið tekin á veirufræðideild Landspítalans, sem hefur greint langflesta þá smituðu, í gær en daginn áður.

Fjöldi jákvæðra smita á veirufræðideildinni undanfarinn sólarhring eru fjörutíu úr 335 prófum. Jákvæðu smitin sólarhringinn á undan voru 93 úr 597 prófum. Hlutfall jákvæða smita á veirufræðideildinni var því 12 prósent undanfarinn sólarhring en 16 prósent sólarhringinn á undan. Hlutfall jákvæðra smita úr sýnatöku Íslenskrar erfðagreiningar, þar sem fólk er greint án þess að vera með einkenni, er áfram undir einu prósenti.

Á síðunni kemur einnig fram að 44  manns hafi verið lagðir inn á sjúkrahús vegna faraldursins, þar af tólf á gjörgæslu.

Alls hefur 309 manns batnað af veikinni. Þá eru 6.300 manns í sóttkví og 1.051 í einangrun.  Þeim sem eru í sóttkví fækkar um 866 á milli daga og hafa nú alls 10.289 manns lokið sóttkví. Sýni hafa verið tekin úr 22.195 manns.

Klukkan tvö verður, líkt og síðustu daga, haldinn upplýsingafundur almannavarna, landlæknis og sóttvarnalæknis þar sem farið verður yfir stöðu þeirra mála sem tengjast faraldri kórónuveirunnar og aðgerðum til þess að sporna við útbreiðslu.

Víðir Reynisson yfirlögregluþjónn, Alma D. Möller landlæknir og Þórólfur Guðnason, sóttvarnalæknir, munu fara yfir stöðu mála með tilliti til COVID-19 hér á landi. Páll Matthíasson, forstjóri Landspítalans, verður einnig á fundinum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×