Lægðardrag þokast suður yfir landið í dag og mun því víða fylgja lítilsháttar rigning og jafnvel slydda norðaustanlands.
Í hugleiðingum veðurfræðings kemur fram að á Suðausturlandi verði líklegast þurrt fram á kvöld og þar verði einnig hlýjast, þar sem hámarkshiti verður á bilinu 10 til 15 stig. Annars má búast við vestan 5 til 13 metrum á sekúndu og hita víða 5 til 13 stig.
„Í nótt má hins vegar búast við frosti á öllu norðan- og austanverðu landinu.
Það er útlit fyrir hægan vind á morgun og bjart veður norðan heiða en dálitla rigningu syðst á landinu fram eftir degi. Hiti 2 til 9 stig.
Á miðvikudag er spáð vestan kalda með smáskúrum víða og hita á bilinu 5 til 10 stig,“ segir í hugleiðingum veðurfræðings.
Veðurhorfur á landinu næstu daga
Á þriðjudag: Vestan 3-10, skýjað og dálítil rigning syðst á landinu, en bjart með köflum N-lands. Hiti 2 til 9 stig.
Á miðvikudag: Vestan 5-13 m/s. Stöku skúrir V-lands og dálítil væta við N-ströndina, annars skýjað en þurrt. Hiti breytist lítið.
Á fimmtudag: Vestlæg átt og rigning, en úrkomulítið á A-verðu landinu. Hiti 3 til 12 stig, hlýjast SA-lands.
Á föstudag: Austlæg átt, rigning með köflum og hiti 5 til 10 stig, en þurrt NA-lands og hiti 0 til 5 stig.
Á laugardag og sunnudag: Austanátt og úrkomulítið, en rigning með köflum S-lands.
