Innrita nemendur án samþykkis ráðuneytis

Byrjað er að innrita nýja nemendur í Menntaskólann Hraðbraut þrátt fyrir að námið sé ekki samþykkt af menntamálaráðuneyti. Óvíst er um upphæð námsgjalda og jöfnunarstyrki. Ráðuneytinu hafa borist fyrirspurnir frá foreldrum.

Mennta- og menningarmálaráðuneytinu hafa borist fyrirspurnir um rétt nemenda til að fá nám sitt á fyrra námsári í Menntaskólanum Hraðbraut metið í öðrum framhaldsskólum. Samkvæmt upplýsingum frá ráðuneytinu má ráða af fyrirspurnunum að ekki séu ljós möguleg áhrif þess að námið er ekki lengur viðurkennt af yfirvöldum.

Innritun fyrir nýja nemendur skólaárið 2012 og 2013 í Hraðbraut hófst í vikunni. Ólafur Johnson skólastjóri segir að þó sé ekki vitað hversu há skólagjöldin verða, en þau eru nú 249 þúsund krónur fyrir árið. Hann telur líklegt að gjöldin hækki náist ekki nýir samningar við ráðuneytið fyrir sumarið. Samkvæmt Ólafi er ekki vitað til þess að nokkur nemandi hafi skráð sig.

„Það verður fullt af fólki sem mun sækja um skólavist ef við störfum næsta vetur, ég hef engar áhyggjur af því,“ segir Ólafur. „En auðvitað er það áhyggjuefni að umsóknum beint úr grunnskólum hefur fækkað og það má segja að það sé partur af aðför ráðuneytisins að reyna að tryggja að erfitt sé að sækja um í skólann.“

Ólafur skoraði á Katrínu Jakobsdóttur menntamálaráðherra að mæta á opinn fund um málefni skólans sem átti að fara fram í gærkvöld. Honum var þó aflýst þar sem ekkert svar barst frá ráðuneytinu, að sögn Ólafs. Katrín hefur verið stödd erlendis alla vikuna.

Ólafur segist þurfa að leggja út fyrir kostnaði við rekstur skólans úr eigin vasa, skipti ráðuneytið ekki um skoðun.

„Það er á mína persónulegu fjárhagslegu ábyrgð ef eitthvað fer úrskeiðis í fjármálum skólans,“ segir hann. „Ég er með veð í öllum mínum eignum og konunnar minnar og ég mundi tryggja skólastarfið áfram með sama hætti.“

Námið fyrir árið 2012 og 2013 er ekki samþykkt af ráðuneytinu þar sem fallið var frá þjónustusamningum við skólann síðasta haust. Ekki er gert ráð fyrir fjárveitingum til Hraðbrautar í fjárlögum þessa árs. Þeim nemendum sem þegar voru skráðir í námið var þó gefinn kostur á því að klára það fram til vorsins 2012.sunna@frettabladid.is