Innlent

„Eitthvað sem höfum ekki séð áður“ gangi spárnar eftir

Jóhann K. Jóhannsson og Tryggvi Páll Tryggvason skrifa
Frá Sauðárkróki í morgun.
Frá Sauðárkróki í morgun. Vísir/Jói K.

Stefán Vagn Stefánsson, yfirlögregluþjónn hjá lögreglunni á Norðurlandi vestra segir að veðrið sem spáð er að muni ganga yfir landsfjórðunginn í dag og á morgun leggist ekki vel í hann. Hann telur þó að íbúar og viðbragðsaðilar á svæðinu sé búnir að gera þær ráðstafnir sem þarf svo lágmarka megi tjón vegna veðurs.

Fyrsta rauða viðvörun í sögu veðurviðvörunarkerfis Veðurstofunnar er í gildi á Norðurlandi vestra og Ströndum frá klukkan 17 í dag til miðnættis. Appelsínugul viðvörun hefur verið í gildi frá því snemma í morgun á svæðinu og er hún í gildi allt til hádegis á morgun, og lengur annars staðar á landinu.

„Ef að spárnar ganga eftir þá er þetta eitthvað sem við höfum ekki séð áður. Þær líta bara alls ekki vel út og að það stefnir í vonskuveður,“ sagði Stefán Vagn í samtali við Jóhann K. Jóhannsson fréttamann sem staddur er á Sauðárkróki. Veður er farið að versna en það versta á eftir að ganga yfir.

„Þetta leggst ekkert sérstaklega vel í mig en ég held að við séum búnir að gera allar þær ráðstafanir sem að hægt er, bæði lögreglan og aðrir viðbragðsaðilar á svæðinu,“ sagði Stefán Vagn.

„Ég held að fólk sé meðvitað um hvað er í vændum og hafi gert þær ráðstafanir sem hægt er til þess að verjast þessu.“

Svona líta viðvaranirnar út um kvöldmatarleytið. Skjáskot/veðurstofan

Varað hefur við snjóflóðahættu á Tröllaskaga og búist er við að veðrinu fylgi gríðarlegt fannfergi á Norðurlandi.

„Menn eru að gera ráð fyrir því að á fimmtudeginum þegar þetta allt saman er gengið yfir þá geti verið allt að þriggja metra jafnfallinn snjór á Öxnadalsheiði. Þannig að við erum að tala um alveg gríðarlega ofankomu og gríðarlegt fannfergi gangi þetta eftir,“ segir Stefán Vagn.

Þrír snjóbílar voru sendir frá Reykjavík og Akranesi í gær og eru þeir staðsettir á Hvammstanga, Skagaströnd og í Hrútafirði.

„Samkvæmt spánni er versta veðrið í Hrútafirðinum og þar í kring en veðrið verður alls staðar mjög mjög vont. Við erum ekkert að horfa í einhver einstök svæði. Við erum að horfa á svæðið allt og reyna að dreifa mannskap og björgum eins víða og hægt er þannig að við getum lágmarkað þann tíma sem það tekur fyrir viðbragðsaðila að koma sér á staðina,“ segir Stefán Vagn.

Fólk hefur eindregið verið hvatt til að halda sér heima en segir Stefán Vagn að þurfi einhver á aðstoð að halda eigi þeir sömu ekki að hika við að hafa samband við lögreglu.

„Það sem við höfum sagt er að verði veðrið eins vitlaust og spár gera ráð fyrir þá höfum við hugfast að auðvitað getur tekið mjög langan tíma að koma til fólk og við gætum mögulega þurft að forgangsraða verkefnunum þannig að einhver minni verkefni geti beðið. Við vonum að til þess muni ekki koma en við hvetjum fólk að sjálfsögðu til að hringja eða senda skilaboð ef þeim vantar aðstoð og við munum reyna að bregðast við því eins hratt og mögulegt er.“


Tengdar fréttir

Jólunum komið í skjól fyrir veðurofsanum

Starfsmenn Reykjavíkurborgar hafa unnið að því í morgun að tryggja stórar jólaskreytingar í miðbænum áður en mikið hvassviðri skellur á síðdegis í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.