Innlent

Björgólfur segist viss um að Samherji hafi ekkert ólöglegt gert

Samúel Karl Ólason skrifar
Í viðtalinu segist Björgólfur ekki hafa getað neitað beiðni um að taka við stöðu framkvæmdastjóra Samherja. Hann og Þorsteinn Már Baldvinsson séu gamlir vinir.
Í viðtalinu segist Björgólfur ekki hafa getað neitað beiðni um að taka við stöðu framkvæmdastjóra Samherja. Hann og Þorsteinn Már Baldvinsson séu gamlir vinir. Vísir/Sigurjón

Björgólfur Jóhannsson, forstjóri Samherja, segist í viðtali við blaðið Dagens Næringsliv í Noregi ekki trúa því að Samherji hafi greitt neinar mútur. Hann segist efast um að fyrirtækið hafi verið flækt í nokkuð ólöglegt. Aðspurður af blaðamanni segir Björgólfur að ekkert bendi til að greiðslur til eignarhaldsfélags eins of hinum svokölluðu hákörlum í Dubaí hafi verið ólöglegar.

Hann segist fullviss að Samherji hafi fengið kvóta eftir löglegum leiðum í öllum löndum. Björgólfur segir að Samherji ætli að draga fram í dagsljósið hvað átti sér stað og að hans eigin hlutverki verði líklega lokið á fyrsta fjórðungi nýs árs.

Viðtal DN hefst á því að Samherji fái yfirleitt litla sem enga athygli fyrir utan Íslands. Það hafi hins vegar breyst í haust með útgáfu Samherjaskjalanna og málið tengist Noregi þar sem gífurlegar fjárhæðir hafi ferið í gegnum DNB bankann í Noregi og til skattaskjóla og til fyrirtækis í Dúbaí, sem var í eigu James Hatuikulipi, fyrrverandi stjórnarformanns Fischor, ríkisútgerðar Namibíu. Þar hefur ráðherrum verið vikið úr starfi og þó nokkrir hafa verið handteknir vegna rannsóknar á meintum mútugreiðslum Samherja í Namibíu.

Björgólfur segist þó ekki trúa því að nokkuð ólöglegt hafi átt sér stað.

Samherji hefur farið hart fram gegn Jóhannesi Stefánssyni, fyrrverandi starfsmanni Samherja í Namibíu sem lak að minnst hluta Samherjaskjalanna svokölluðu til Wikileaks. Ein fyrstu viðbrögð Samherja við umfjöllun um starfsemi félagsins í Namibíu voru að skella allri hugsanlegri skuld á Jóhannes sjálfan. Þá var gefið út að árið 2016 hafi félagið hafið rannsókn á störfum Jóhannesar þar í landi vegna gruns um að hann hafi flækt félagið í ólöglega starfsemi.

Sjá einnig: Þorsteinn Már skellir skuldinni á uppljóstrarann

Samherji hefur sömuleiðis kvartað yfir því að einungis hluti tölvupósta Jóhannesar hafi verið birtur. Í viðtalinu er vitnað í bréf frá Björgólfi til starfsmanna Samherja að það að póstar hafi verið valdir til birtingar veki spurningar um innihald hinna póstanna. Nánast engir póstar frá 2015 hafi verið afhentir Wikileaks.

Jóhannes segir að fleiri póstar verði birtir á næstunni.

Í byrjun mánaðarins sagði Björgólfur í svari við fyrirspurn Vísis að fyrirtækið hefði aðgang að tölvupóstum Jóhannesar. Hann vildi þó ekki tjá sig um innihald þeirra né hvort þeir hafi verið skoðaðir.

Björgólfur segir blaðamanni DN að hann telji að hinir óbirtu póstar myndu varpa frekari ljósi á málið.

Spurður út í það af hverju greiðslur til áðurnefnds fyrirtækis í Dúbaí hafi haldið áfram eftir að Jóhannes hætti störfum hjá Samherja segir Björgólfur það ekki til marks um að eitthvað ólöglegt hafi átt sér stað.

Greiðslurnar gætu verið tengdar einhvers konar samkomulagi. Mögulega fyrir ráðgjafastörf eða reglulegar greiðslur fyrir hefðbundin kaup á kvóta.

Þá var Björgólfur spurður hvort það væri eðlilegt að greiða einkaaðilum fyrir kvóta í öðrum löndum og sagðist hann ekki geta svarað því, þar sem málið væri í rannsókn. Ef maður fengi reikning fyrir þjónustu eða kvóta, þá borgaði maður þann reikning.

Þar að auki sagðist Björgólfur ekki telja að greiðslurnar til einkaaðila í Namibíu hafi verið ólöglegar. Reikningar hafi borist frá fyrirtækjum sem seldu kvóta og þeir hafi verið greiddir.

Seinna í viðtalinu segir Björgólfur að Samherji hafi greitt sama verð fyrir kvóta og allir aðrir.


Tengdar fréttir

Jóhannes segist hafa verið með allt að þrettán lífverði

Jóhannes Stefánsson, fyrrverandi starfsmaður Samherja í Namibíu sem kom þúsund gagna til Wikileaks eftir að hann hætti störfum hjá sjávarútvegsfyrirtækinu, segist hafa notast við lífverði reglulega undanfarin rúm þrjú ár.

Saka hvort annað um að misskilja málið

Þingflokksformaður Sjálfstæðisflokksins segir tillögu í stjórnskipunar-og eftirlitsnefnd um frumkvæðissathugun á hæfi sjávarútvegsráðherra byggða á misskilningi. Formaður nefndarinnar segir hins vegar þingflokkformanninn misskilja málið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.