Innlent

Samherji hefur „eðlilega“ aðgang að tölvupóstum Jóhannesar en tjáir sig ekki um innihaldið

Kristín Ólafsdóttir skrifar
Björgólfur Jóhannsson, starfandi forstjóri Samherja.
Björgólfur Jóhannsson, starfandi forstjóri Samherja. Vísir/Vilhelm

Björgólfur Jóhannsson starfandi forstjóri Samherja segir að fyrirtækið hafi „eðlilega“ aðgang að tölvupóstum Jóhannesar Stefánssonar, uppljóstrara og fyrrverandi stjórnanda fyrirtækisins í Namibíu, frá árunum 2014-12016. Á þessum tímapunkti muni fyrirtækið þó hvorki tjá sig um efnisinnihald þeirra né hvort það hafi látið skoða póstana.

Þetta kemur fram í svari Björgólfs við fyrirspurn fréttastofu vegna yfirlýsingar Samherja frá því fyrr í dag, þar sem fyrirtækið sakar Jóhannes um að „handvelja“ þá tölvupósta sem hann afhenti WikiLeaks.

Jóhannes hætti störfum hjá Samherja í desember árið 2016. Samherja og Jóhannesi ber ekki saman um hvernig starfslokin bar að; Jóhannes kveðst hafa sagt upp en Samherji hefur haldið því fram að fyrirtækið hafi sagt honum upp fyrir að misfara með fé og hegða sér með óforsvaranlegum hætti.

Eftir starfslokin ákvað Jóhannes að láta WikiLeaks fá þrjátíu þúsund gögn, sem varpa ljósi á það hvernig Samherji eigi að hafa beitt sér með ólöglegum og ólögmætum hætti til að sölsa undir sig gjöful fiskimið undan ströndum Namibíu.

Hljóti að vekja upp spurningar

Í yfirlýsingu sem Samherji sendi frá sér í dag er Jóhannes sakaður um að „handvelja“ þá tölvupósta sem hann afhenti WikiLeaks. Samherji hafi undanfarið látið kanna gögn WikiLeaks, sem aðallega eru tölvupóstar úr pósthólfi Jóhannesar. Í yfirlýsingunni segir jafnframt að Jóhannes hafi haft að minnsta kosti 44.028 tölvupósta í pósthólfi sínu á árunum 2014 til 2016.

Jóhannes hafi hins vegar aðeins afhent WikiLeaks 18.497 tölvupósta frá þessu tímabili. Þannig virðist sem Jóhannes hafi ekki afhent WikiLeaks neina tölvupósta frá árinu 2015, að undanskildum nokkrum tölvupóstum í janúar.

Jóhannes Stefánsson leysti fyrst frá skjóðunni opinberlega í þættinum Kveiki í byrjun nóvember. Mynd/RÚV

Þetta segir Samherji að hljóti að vekja upp spurningar.

„Hvert var efni þeirra pósta sem ekki voru birtir? Hvers vegna voru þau tímabil sem um ræðir valin en ekki allt tímabilið? Er ósamræmi í þeim gögnum sem var sleppt og þeim sem hingað til hefur verið fjallað um?“ segir í yfirlýsingu Samherja.

„Sú staðreynd að 58% af tölvupóstunum voru aldrei birt hlýtur að vera umhugsunarefni fyrir þá sem telja að frásögn Jóhannesar Stefánssonar sé rétt og sannleikanum samkvæm. Þeir fjölmiðlar sem fjallað hafa um málið þurfa líka að velta fyrir sér hvort þeir hafi aðeins séð þau gögn sem styðja frásögn heimildarmannsins en ekki heildarmyndina.“

Ekki kemur fram í yfirlýsingunni hvort fyrirtækið hafi sjálft aðgang að póstum Jóhannesar á tímabilinu sem hér um ræðir. Ekki er heldur skýrt hvort fyrirtækið telji að eitthvað í tölvupóstum Jóhannesar frá 2015 kunni að skipta máli fyrir áðurnefnda „heildarmynd“.

Tjá sig ekki um það hvort póstarnir hafi verið skoðaðir

Björgólfur Jóhannsson, starfandi forstjóri Samherja, segir í skriflegu svari við fyrirspurn Vísis að Samherji hafi „eðlilega“ aðgang að tölvupóstum Jóhannesar, enda séu þeir vistaðir á póstþjónum fyrirtækisins.

„Þegar við sáum að Jóhannes hafði afhent Wikileaks tölvupósta frá umræddu tímabili létum við gera samanburð á þeim póstum sem eru inni á Wikileaks og þeim póstum sem eru inni á póstþjónum Samherja. Við getum séð magnið óháð því hvort póstarnir sjálfir séu opnaðir og lesnir.”

Inntur eftir því hvort eitthvað sérstakt sé að finna í tölvupóstunum, sem félagið telji eða viti að gæti skipt máli í tengslum við málið segir Björgólfur að fyrirtækið tjái sig ekki um innihald þeirra að svo stöddu. Þá ítrekar hann það sem fram kemur í yfirlýsingunni frá því í dag.

„Á þessum tímapunkti ætlum við ekki að tjá okkur um efnisinnihaldið eða hvort við höfum látið skoða þessa tölvupósta. En þetta er svona það sem við vildum varpa fram til umhugsunar fyrir þá sem fjallað hafa um málið. Hvers vegna er öllu þessu magni af tölvupóstum sleppt? Ef markmiðið er að segja satt og rétt frá atburðum, hvers vegna er 58% af tölvupóstunum sleppt? Að öðru leyti vísum við til þeirra atriða sem komu fram í tilkynningu á vef félagsins fyrr í dag.“

Fréttastofa hefur ekki náð tali af Jóhannesi Stefánssyni í dag eða síðustu vikur þrátt fyrir ítrekaðar tilraunir.

Kristinn Hrafnsson talsmaður WikiLeaks hafði lítið að segja um tilkynningu Samherja þegar Vísir náði tali af honum í dag en benti blaðamanni á að spyrja Samherja „hvað í ósköpunum þeir væru að dylgja um“.

Fréttin hefur verið uppfærð.


Tengdar fréttir

Íhuga að kalla Jóhannes fyrir dóm í Namibíu

Líkur eru á því að Jóhannes Stefánsson, fyrrverandi starfsmaður Samherja í Namibíu sem kom Samherjaskjölunum svonefndu í hendur Wikileaks, verði kallaður fyrir dóm sem vitni í máli á hendur sex mönnum sem ákærðir hafa verið fyrir spillingu, fjársvik og mútuþægni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.