Innlent

Stútar á ferð og flugi um höfuðborgarsvæðið

Samúel Karl Ólason skrifar
Í gærdag framvísaði ökumaður fölsuðu ökuskírteini þegar hann var stöðvaður í Kópavogi.
Í gærdag framvísaði ökumaður fölsuðu ökuskírteini þegar hann var stöðvaður í Kópavogi. Vísir/Vilhelm

Brotist var inn í bíl í Vesturbænum á fimmta tímanum í nótt. Búið var að opna hurðir og skottlok bílsins og lágu munir úr honum á götunni. Lögreglunni hefur þó ekki tekist að ná í eiganda bílsins og því liggur ekki fyrir hverju var stolið. Þá var nokkuð um stúta á höfuðborgarsvæðinu í nótt, samkvæmt dagbók lögreglunnar.

Einn slíkur hafði bakkað á staur í miðbænum og var hann handtekinn. Annar, sem stöðvaður var á Suðurlandsbraut, reyndist 17 ára gamall og var málið afgreitt með aðkomu foreldra og tilkynningu til Barnaverndar.

Þá stöðvaði lögreglan bíl á Krýsuvíkurvegi í gærkvöldi. Ökumaður hans er grunaður um akstur undir áhrifum fíkniefna og akstur án réttinda. Hann hefur aldrei fengið ökuskírteini.

Í gærdag framvísaði ökumaður fölsuðu ökuskírteini þegar hann var stöðvaður í Kópavogi en hann var handtekinn vegna gruns um ölvun við akstur, akstur án réttinda og skjalafals. Einn til viðbótar var handtekinn í Breiðholti í nótt en sá var talinn undir áhrifum fíkniefna og hefur ítrekað verið sviptur ökuréttindum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.