Króatíski miðjumaðurinn Ivan Rakitic er ósáttur við hversu fá tækifæri hann hefur fengið hjá Barcelona í upphafi tímabils.

Rakitic hefur aðeins einu sinni verið í byrjunarliði Barcelona á tímabilinu.

„Hvernig nýt ég mín? Með því að spila fótbolta,“ sagði Rakitic.

„Eins og ég segi stundum, ég er leiður eins og dóttir mín þegar ég tek dótið af henni. Barcelona hefur tekið boltann af mér og ég er leiður yfir því.“

Rakitic gæti verið á förum frá Barcelona eftir fimm ár hjá félaginu.

„Ég skil og virði ákvarðanir þjálfarans en mér finnst ég hafa skilað mínu. Ég vil halda áfram að hafa gaman. Það er það mikilvægasta og gerist aðeins ef ég fæ að spila,“ sagði hinn 31 árs Rakitic.