Innlent

Tilgangur Jim Ratcliffe sagður bara einn

Jóhann K. Jóhannsson skrifar
Laxastigi í Selá utan við Vopnafjörð.
Laxastigi í Selá utan við Vopnafjörð. Vísir/Jóhann K.

Breski auðkýfingurinn Jim Ratcliffe vinnur nú að uppbyggingu lax og lífríkis í ám á Norðausturlandi. Talsmaður hans segir Íslendinga ekki þurfa að hafa neinar áhyggjur af fyrirætlunum hans því verkefnið sé bara eitt.

Það hefur orðið hnignun á þessu svæði. Það eina sem vaki fyrir Jim Ratcliffe og fjárfestum á hans vegum með jarðarkaupum, að þeirra sögn, er að vernda íslenska laxinn og þar með laxinn í Norður-Atlantshafinu.

Hann ásamt sveitarfélögum á svæðinu vilja að árnar og laxinn verði sjálfbær en talið er að laxastofninn nú sé ekki nema fjórðungur af því sem hann var í kringum 1970, en flestar tegundir sem hafa orðið slíkri hnignun hafa verið flokkaðar í útrýmingarhættu. Fjölmiðlamönnum var boðið í dag að kynnast verkefninu og skoða árnar.

Í ágúst staðfesti breski auðkýfingurinn Jim Ratcliffe að hann hefði fest kaup á jörðinni Brúarlandi 2 í Þistilfirði, en fyrir á hann þónokkrar jarðir á Norðausturlandi, sem sagðar eru keyptar sem hluti af uppbyggingu á sjálfbæru verndarsvæði laxa. Auk þessa jarðarkaupa er Ratcliffe meirihlutaeigandi í Veiðifélaginu Streng.

Gísli Ásgeirsson, framkvæmdastjóri Veiðifélagsins Strengs Vísir/Jóhann K.

Laxastigar hjálpa til

Hluti af aðgerðum hans til verndar laxinum, sem áætlaðar eru á næstu fimm árum, snýr að því að útvíkka hrygningarsvæði laxins með byggingu nýrra laxastiga í Hafralónsá, Hofsá og Miðfjarðará í Vopnafirði. Þá er fyrirhuguð umfangsmikil slepping á frjóvguðum hrognum í þessum ám, auk Selár. Verður það í samræmi við almenna veiðireglu ánna um að veiddum fiski sé sleppt aftur.

„Það hefur verið mjög farsælt verndunarstarf stundað, sérstaklega hér, í Vopnafirði, við þessar ár hér. Við höfum takmarkað veiðiálag. Við höfum farið í það að vera með veiði og sleppa,“ segir Gísli Ásgeirsson, framkvæmdastjóri Veiðfélagsins Strengs.

Selá Vísir/Jóhann K.

Vinna að gróðuruppbyggingu líka

Með þeirri uppbyggingu sem Ratcliffe vinnur að er að auki unnið gegn jarðeyðinu og bættu heilsufari vistkerfis ánna, með fjárfestingu skóga og endurheimt gróðurfars.

„Skógræktarverkefnið sjáum við bara þegar tré fara að vaxa og ef það gengur allt saman og hrognagröfturinn er mældur og afraksturinn er mældur árlega og það kemur út skýrsla frá Hafrannsóknarstofnun , sem er gefin út á hverju ári, og þar má sjá árangurinn af því starfi sem hér er verið að vinna,“ segir Gísli.

Ratcliffe og Hafrannsóknarstofnun undirrituðu samkomulag um miðjan ágúst um rannsókn, sem er að fullu fjármögnuð af Ratcliffe. Rannsóknin nær til nýrra sviða vistfræði og hegðunar laxins.

Hefur umræðan um jarðakaup auðmanna skyggt á þetta verkefni?

“Maður skilur áhyggjurnar sem að hafa vaknað út af fjárfestingum á jörðum á Íslandi. Við höfum bara farið eftir þeim reglum og lögum sem gilda og höfum fengið færa vísindamenn til þess að hjálpa okkur við að stefna að því sem að við viljum gera. Það er bara það sem við ætlum að gera áfram,” segir Gísli.
 


Tengdar fréttir

Víðtæk áhrif á Atlantshafslax af áformum Ratcliffes ólíkleg

Formaður Landssambands veiðifélaga telur ekki ólíklegt að fyrirhugaðar framkvæmdir Jims Ratcliffe gætu haft jákvæð áhrif í þeim ám sem framkvæmdirnar snúa að. Hins vegar geri þær lítið fyrir stofninn í heild sinni. Sveitarstjórnarrráðherra undrast seinagang í stjórnsýslunni og vill lagafrumvarp í haust.

Ratcliffe boðar nýja laxastiga og miklar hrognasleppingar

Auðmaðurinn Jim Ratcliffe vill útvíkka hrygningarsvæði laxa á Norðausturlandi þar sem hann á fjölda bújarða. Í yfirlýsingu segir að hann standi að ítarlegri langtímarannsókn á afkomu laxa í íslenskum ám og í norðanverðu Atlantshafi í samstarfi við Hafrannsóknastofnun hér og íslenska og erlenda háskóla.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.