Menning

Steinunn tekur við starfi Jónasar

Atli Ísleifsson skrifar
Steinunn Sigurðardóttir.
Steinunn Sigurðardóttir. Háskóli Íslands

Steinunn Sigurðardóttir, skáld og rithöfundur, gegnir starfi Jónasar Hallgrímssonar í ritlist við Háskóla Íslands í vetur. Mun hún einkum vinna með meistaranemum að ljóðagerð.

Stofnað var til starfsins árið 2015 til að efla starf í ritlist við Íslensku- og menningardeild.

Í tilkynningu frá Háskólanum segir að Steinunn hafi verið í skáldhópnum Listaskáldin vondu, ein kvenna, á áttunda áratug síðustu aldar. 

„Hún hafði þá þegar sent frá sér tvær ljóðabækur, hina fyrstu, Sífellur, þegar hún var nítján ára, og fagnar Steinunn nú 50 ára rithöfundarafmæli. Hún lauk háskólaprófi í sálarfræði og heimspeki frá University College Dublin.

Steinunn hefur hlotið ýmsar viðurkenningar fyrir ritstörf sín. Hún hlaut verðlaun Jónasar Hallgrímssonar á degi íslenskrar tungu árið 2014 og ljóðaverðlaun Guðmundar Böðvarssonar árið 2017. Henni voru veitt verðlaun íslenskra bóksala fyrir skáldsöguna Jójó og fyrir bókina um Heiðu sem hlaut einnig Fjöruverðlaunin.

Steinunn fékk Íslensku bókmenntaverðlaunin fyrir skáldsöguna Hjartastað og hafa fimm aðrar bækur hennar verið tilnefndar til sömu verðlauna,“ segir í tilkynningunni.

Sigurður Pálsson, Vilborg Davíðsdóttir og Hlín Agnarsdóttir eru í hópi þeirra sem hafa áður gegnt starfi Jónasar Hallgrímssonar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.