Júlíspá Siggu Kling - Meyjan: Ekki láta drauma annarra hafa áhrif á þig

Elsku Meyjan mín, þú magnaða sál og meiriháttar týpa, þú ert svo mikill bardagamaður í eðli þínu og þolir alls ekki að tapa, berst fyrir hugsjónum þínum og sannfæringu og leyfir öðrum að deila með þér þegar árangri er náð, þess vegna ertu svo vinamörg.

Þú skalt alveg sleppa því að láta annarra manna drama hafa áhrif á þig, því þú átt það til að sveiflast og tengja þig erfiðleikum annarra og þá sérðu allt í miklu neikvæðara ljósi. Það er svo mikilvægt þú gerir upp hug þinn um hvað þú vilt því þá getur enginn fengið þig til að skipta um skoðun.

Þetta tímabil sem þú ert að fara inn í núna róar þig og nærir andlega og innsæi þitt verður sterkara; þú finnur á þér hvernig þú ætlar að leysa þessa krossgátu sem er fyrir framan þig. Það er eins og að svörin komi upp í hendurnar á þér, svör við því sem hefur verið falið og þú átt eftir að finna sterkara afl til þess að láta það sem þig raunverulega langar til að rætast. Þú átt samt sem áður að fara þér hægt og rólega, því tíminn mun vinna með þér, haustið verður uppskeruhátíð og gefur þér möguleika á betri heimilisaðstæðum og öryggi og þá muntu virkilega njóta þín.

Þín einlæga, tignarlega og töfrandi framkoma mun laða að sér það sem þér finnst þig vanta, en skoðaðu fyrst hversu margt og mikið þú hefur og þakkaðu fyrir það, því eftir því sem þú þakkar meira fyrir það sem þú hefur nú þegar opnast óendanlegar gáttir og til þín streyma endalausar gjafir.

Mörgum finnst erfitt að átta sig á Meyjunni því það er eins og hún sé með prik í rassinum, alveg að drepast úr stífni, en þú ert svo sannarlega týpan sem reddar öllu, bjargar partýinu og kemur öllum endalaust á óvart.

Knús og kveðja, þín Sigga Kling

Meyja 23. ágúst - 22. september

Manuela Ósk fyrirsæta, 29. ágúst 

Edda Björgvinsdóttir leikkona, 13. september 

Beyoncé Knowles söngkona, 4. september 

Gylfi Þór Sigurðsson, fótboltamaður, 8. september 

Eiður Smári Guðjohnsen, fótboltamaður, 15. september 

Sigrún Ósk Kristjánsdóttir sjónvarpskona, 7. september 

Annie Mist crossfittari, 18. september 

Logi Pedro Stefánsson tónlistarmaður, 29. ágúst 

Sema Erla Serdar, baráttukona, 4. september 

Raggi Bjarna, söngvari, 22. september 

Skúli Mogensen, athafnamaður, 18. september 

Ari Eldjárn, grínisti, 5. september 

Sara Sigmundsdóttir, Crossfit-stjarna, 12. september 

Elín Margrét Böðvarsdóttir, fréttakona, 27. ágúst