Væta um allt land og hellidembur síðdegis
Grunn lægð fer austur yfir sunnanvert landið í dag með tilheyrandi vætu um landið allt og má búast við hellidembum síðdegis í dag en styttir upp í fyrramálið. Þetta kemur fram í hugleiðingum veðurfræðings hjá Veðurstofu Íslands.
Hitinn verður á bilinu átta til átján stig en spáð er tveggja stafa hitatölum á höfuðborgarsvæðinu í dag og hlýjast sunnanlands. Á eftir lægðinni snýst hann í norðanátt, víða átta til þrettán metrar á sekúndu á morgun og hitinn á bilinu átta til átján stig.
Léttskýjað sunnan- og vestanlands og áfram hlýjast á Suðurlandi en skýjað fyrir norðan og austan og dálítil væta í fyrstu.
Á laugardag er útlit fyrir hægari norðanátt með þurru og björtu verði, en fer að rigna norðaustantil á landinu síðdegis eða um kvöldið.
Veðurhorfur á landinu næstu daga:
Á laugardag:Norðan 3-8 og víða léttskýjað, en norðvestan 8-13 og fer að rigna norðaustanlands seint. Hiti frá 6 stigum norðaustantil upp í 18 stig á Suður- og Vesturlandi.
Á sunnudag:
Norðan 8-13 og rigning eða súld, einkum norðaustanlands, en þurrt á Suður- og Vesturlandi. Hiti 5 til 15 stig, mildast syðst.
Á mánudag og þriðjudag:
Austlæg átt, skýjað og dálítil væta. Hiti 8 til 15 stig.
Á miðvikudag:
Útlit fyrir suðaustlæga átt, skýjað með köflum og líkur á rigningu við suður- og austurströndina. Hiti breytist lítið.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
