Innlent

Fyrsta degi verkfallsaðgerða lokið

Sunna Kristín Hilmarsdóttir skrifar
Myndin er tekin við Gamla bíó á föstudagsmorugn þar sem Efling var með verkfallsmiðstöð sína.
Myndin er tekin við Gamla bíó á föstudagsmorugn þar sem Efling var með verkfallsmiðstöð sína. vísir/vilhelm
Verkfalli hótelþerna sem eru félagsmenn í Eflingu lauk nú á miðnætti. Þar með er fyrsta degi verkfallsaðgerða félagsins lokið. Í dag, laugardag, lýkur svo kosningu um frekari verkfallsaðgerðir sem Efling og VR hafa boðað síðar í mánuðinum.

Verði verkfallsaðgerðirnar samþykktar í atkvæðagreiðslum félaganna og ef samningar hafa ekki náðst hefjast þær þann 18. mars næstkomandi.

Sjá einnig: „Algjörlega stórkostlegur dagur“

Ef af verkföllunum verður munu þau ná til starfsfólks á hótelum, til starfsfólks hjá rútufyrirtækjum og til starfsfólks Almenningsvagna Kynnisferða að því er segir á vef Eflingar. Þar má nálgast nánari upplýsingar um það til hvaða hótela aðgerðirnar munu ná sem og á vef VR.  

Á vef Eflingar kemur fram að aðgerðir félagsins séu tvíþættar. Annars vegar fela þær það í sér að mæta til vinnu en sleppa því að gera ákveðna hluti í vinnunni og hins vegar felast að fara í hefðbundið verkfall þar sem ekki er mætt til vinnu á tilteknum dögum frá miðnætti til miðnættis.

Hefðbundið verkfall félagsmanna Eflingar sem og félagsmanna VR verður eftirfarandi daga:

•    22. mars (1 dagur)

•    28.-29. mars (2 dagar)

•    3.-5. apríl (3 dagar)

•    9.-11. apríl (3 dagar)

•    15.-17. apríl (3 dagar)

•    23.-25. apríl (3 dagar)

•    1. maí (þangað til verkfallinu er aflýst)

Félagsmenn Eflingar kjósa svo einnig um eftirfarandi örverkföll eða vinnutruflanir eins og það er kallað á vefsíðu félagsins:

Hjá rútubílstjórum eru vinnutakmarkanirnar eftirfarandi:

•    18. mars – 30. apríl

o    Einungis er unnið það sem stendur í starfslýsingu og ekkert annað.

•    23. mars – 30. apríl

o    Bílstjórar rukka ekki í strætó, né telja farþega.

•    6. apríl – 30. apríl

o    Ekki mætt til vinnu fyrir hádegi.

Hjá hótelstarfsmönnum eru vinnutakmarkanirnar eftirfarandi:

•    18. mars til og með 30. apríl:

o    Engin vinna sem ekki er tiltekin í starfslýsingu

•    23. mars til og með 30. apríl:

o    Engin klósettþrif

o    Engin þrif sameiginlegra rýma

•    30. mars til og með 30. apríl:

o    Engin þrif herbergja sem gestir eiga eftir að tékka sig úr

o    Engin morgunverðarþjónusta

•    26. apríl til og með 30. apríl:

o    Engin þvottaþjónusta


Tengdar fréttir

Viðar segir að eitthvað hafi verið um verkfallsbrot

Viðar Þorsteinsson, framkvæmdastjóri Eflingar, segir að eitthvað hafi verið um verkfallsbrot í dag en félagsmenn Eflingar sem starfa við þrif á hótelum lögðu niður störf klukkan tíu í morgun og stendur verkfallið til miðnættis.




Fleiri fréttir

Sjá meira


×