West Ham í viðræðum um sölu Arnautovic

West Ham og kínverska félagið Guangzhou Evergrande hafa hafið formlegar viðræður um kaup á austurríska framherjanum Marko Arnautovic samkvæmt heimildum Sky Sports.

Kínverskt félag hefur nú þegar boðið 35 milljóna punda kauptilboð í framherjann sem West Ham hafnaði, félagið var ekki nefnt til nafns fyrst þegar fréttir af tilboðinu bárust en það er talið að um Shanghai SIPG sé að ræða. Nú hefur Guangzhou blandað sér í baráttuna.

West Ham vill ekki selja framherjann og sagði í tilkynningu frá félaginu þegar fyrst bárust fréttir af tilboði Shanghai að hugur hans væri í Lundúnum. Danijel Arnautovic, bróðir og umboðsmaður Marko, segir bróður sinn hins vegar hafa áhuga á að færa sig yfir til Kína.

Manuel Pellegrini, knattspyrnustjóri West Ham, ætlar ekki að taka Arnautovic með sér til Bournemouth fyrir viðureign liðanna á morgun þar sem Austurríkismaðurinn er ekki í réttu hugarástandi til þess að spila. Þetta hefur Sky einnig eftir heimildum sínum.

Arnautovic kom til West Ham frá Stoke árið 2017. Hann hefur skorað 8 mörk í 18 leikjum í öllum keppnum á tímabilinu.