Trump lofar að koma í veg fyrir að störf tapist í Kína

Donald Trump Bandaríkjaforseti setti færslu á Twitter í nótt þess efnis að hann og Xi Jinping, forseti Kína, myndu leita allra leiða til að bjarga kínverska fjarskiptarisanum ZTE. Verð hlutabréfa á mörkuðum í Hong Kong tók strax mikinn kipp við tíðindin.

Bandaríska viðskiptaráðuneytið setti fyrtækið í sjö ára langt viðskiptabann í síðasta mánuði vegna ásakana um að það hefði átt í ólöglegum viðskiptum í Íran og Norður-Kóreu. Um áttatíu þúsund manns starfa fyrir ZTE í Kína en fyrirtækið þyrfti að óbreyttu að hætta allri starfsemi þar sem það reiðir sig á bandaríska íhluti og tækni.

Trump segist nú hafa gefið viðskiptaráðuneytinu skipun um að leysa málið til að koma í veg fyrir að fjöldi starfa tapist í Kína. Þykir það sæta nokkrum tíðindum að Trump hafi áhyggjur af atvinnuleysi í Kína miðað við fyrri yfirlýsingar um viðskiptahalla.

Nú er annað hljóð komið í strokkinn og segja fréttaskýrendur það til marks um að Trump sé að reyna að koma til móts við Kínverja í aðdraganda formlegra viðræðna síðar í þessari viku. Þar munu fulltrúar ríkjanna reyna að vinda ofan af viðskiptastríði sem hófst með innleiðingu tolla á kínverskar innflutningsvörur í Bandaríkjunum.