Sjáðu Michael Owen og Robbie Fowler skora fyrir Liverpool um helgina

Michael Owen og Robbie Fowler eru tveir af mestu markaskorunum í sögu Liverpool en það er orðið langt síðan þeir spiluðu með liðinu.

Michael Owen og Robbie Fowler klæddust hinsvegar báðir búningi Liverpool um helgina og voru að sjálfsögðu á skotskónum.

Owen og Fowler komu báðir ungir inn í aðallið Liverpool og tóku strax upp á því að raða inn mörkum. Þeir eru eins og er í 6. sæti (Robbie Fowler, 183) og 8. sæti (Michael Owen, 158) yfir mestu markaskorarana í sögu Liverpool.

Það var mjög gaman hjá þeim félögum á Anfield um helgina og líka frábært fyrir stuðningsmenn Liverpool að sjá þá aftur í Liverpool-búningnum.

Liverpool mætti þá Bayern Münhcen í svokölluðum LFC Legends leik en með báðum liðum spiluðu gamlar goðsagnir.

Michael Owen og Robbie Fowler voru allt í öllu í byrjun leiks þegar Liverpool-liðið komst í 3-0 en fyrsta mark leiksins skoraði Hollendingurinn Dirk Kyut eftir sendingu frá Owen.

Robbie Fowler skoraði tvö mörk í fyrri hálfleiknum og Owen eitt en Liverpool missti niður forystuna fyrir hlé. Fowler, sem þurfti mun stærri búning en þegar lék síðast með liðinu, var augljóslega búinn á því eftir fjöruga byrjun.

Xabi Alonso lék með báðum liðum í leiknum en hann átti frábær ár hjá Liverpool og endaði ferilinn síðan hjá Bayern München. Xabi Alonso skoraði eitt mark Bayern í 5-5 jafntefli.

Hér fyrir neðan má sjá skemmtilegar svipmyndir frá þessum skemmtilega leik.