Tryggvi óttast að missa skjólið sitt eftir heimsókn borgarstarfsmanns

Tryggvi Hansen sem búið hefur á þriðja ár í rjóðri í útjaðri Reykjavíkur óttast um að missa skjólið sitt. Hann segir að starfsmaður á vegum Reykjavíkurborgar hafi komið til hans í dag og sagst vera að meta aðstæður til að „hreinsa af lóðinni“. Tryggvi er tónlistar- og myndlistarmaður ásamt því að vera torfhleðslumaður. 

Tryggvi segir starfsmanninn hafa verið að meta mögulegan kostnað borgarinnar við að kaupa reitinn. Tryggvi segist ekki vita hver á reitinn en hann sé að skoða það hver það sé og hvort hann geti þá keypt hann.

Áður hefur verið fjallað um aðstöðu Tryggva.

„Því borgin væri að meta hvort hún ætti að kaupa þessa bletti af eigendum leiguréttarins og ef þeir keyptu sem virtist stefnt á þá mundu þeir fella baðstofukotið og skjólið mitt hér og allt mér tengt,“ segir Tryggvi.

Tryggvi segist vera alveg undirlagður af þessari hótun og sé að velta fyrir sér ýmsum möguleikum í stöðunni.

„Athuga með hvort ég get keypt þennan landsrétt eða leigureit er eitt. Athuga hvort ráðandi fólk hjá borginni sé með á þessu að ráðist verði að mér. Óvissa og hótun um að missa allt sitt dót út í regnið er sérstök tegund af spennu,“ segir Tryggvi.