Fjórar milljónir í sekt vegna skráningarvillu

Enska úrvalsdeildarliðið West Ham þarf að greiða rúmar fjórar milljónir íslenskra króna í sekt eftir að brjóta reglur enska knattspyrnusambandsins um lyfjaeftirlit.

Félagið var ákært á dögunum þar sem skráning félagsins á æfingatímum og/eða heimilisföngum leikmanna var ekki rétt þrisvar sinnum á tólf mánaða tímabili.

Eftir að félagið samþykkti ákæruna dæmdi knattspyrnusambandið Lundúnaliðið til þess að greiða 30 þúsund pund í sekt fyrir reglubrotið.

Forráðamenn West Ham vilja ítreka að brotið er vegna mistaka í skráningum í kerfi knattspyrnusambandsins og tengist ekki neinum leikmanna félagsins sérstaklega.