Mikið af ís nærri landi í Jökulsárlóni

Mikið af smáum ísjökum er í Jökulsárlóni og breytt vindátt varð til þess að ekki er unnt að sigla bátum út á lónið. Bátsferðum í jökulsárlón var hætt um klukkan ellefu í dag. Starfsmaður hjá fyrirtæki á svæðinu segir að þeir vilji ekki sigla þegar að svona mikið af smáum jökum er í lóninu og taki enga áhættu með það.

Í samtali fréttastofu við Veðurstofu Íslands kom fram að norðanátt hafi verið á svæðinu í gær sem gæti hafa ýtt jökunum til suðurs með fyrrgreindum afleiðingum. Ísinn er því nær landi heldur en gerist og gengur.