Sjálfstæðisflokkurinn í Reykjavík segir aukafund velferðarráðs sem haldinn var í dag ekki hafa skilað þeim árangri sem vænst var til. Fundurinn fjallaði um vanda heimilislausra í borginni og var samþykkt tillaga um að ráðist í kaup á nýju neyðarskýli fyrir unga heimilislausa vímuefnaneytendur í Reykjavík.

Sjálfstæðisflokkurinn segir þó að alls átta tillögum stjórnarandstöðuflokkanna hafi verið vísað til stýrishópa, skrifstofu velferðarsviðs eða frestað. Enn fremur segir í tilkynningu frá Sjálfstæðisflokknum tillögur meirihlutans sem hafi verið lagðar fram í dag séu á algjörum byrjunarreit. Sem dæmi sé ekki búið að ákveða hvar áðurnefnt skýli eigi að vera eða hvenær því verði komið upp.

Sjá einnig: Leita að húsnæði undir nýtt gistiskýli

Egill Þór Jónsson, borgarfulltrúi og fulltrúi Sjálfstæðisflokksins í velferðarráði Reykjavíkur, segir þær tillögur sem ræddar hafi verið í dag ekki taka á vandanum. Nauðsynlegt sé að fara í öflugri og víðtækari aðgerðir.

„Þær aðgerðir sem boðaðar voru á fundinum í dag eru þar af leiðandi aðeins lítill plástur á stórt samfélagslegt vandamál sem hefur vaxið mikið síðustu ár,“ segir Egill Þór í tilkynningunni og bætir við: „Það þarf að bregðast strax við en það er farið að styttast í veturinn. Ekki er ráð nema í tíma sé tekið enda fóru stjórnarandstöðuflokkarnir í borgarstjórn fram á aukafund í velferðarráði fyrr í sumar og vildum við nýta tímann til að finna lausnir fyrir heimilislausa.“

„Það eru vonbrigði að ekki voru allar þær tillögur til lausnar vandans sem lagðar voru fram af stjórnarandstöðuflokkunum á aukafundi borgarráðs í síðasta mánuði teknar fyrir á fundi velferðarráðs í dag.“