MI5 leyfði hryðjuverkamönnum að fremja morð án ótta við refsingu

Breska leyniþjónustan MI5 bannaði lögreglunni á Norður-Írlandi að handtaka grunaða hryðjuverkamenn nema að höfðu samráði. Þetta kemur fram í tæplega 40 ára gömlum leyniskjölum sem voru gerð opinber í dag. Þá var lögreglan hvött til að reyna frekar að gera hryðjuverkamenn að uppljóstrurum en að ákæra þá fyrir glæpi.

Fjöldi norður-írskra ódæðismanna var fyrir vikið ósnertanlegur af lögreglunni. Þeir héldu áfram að fremja morð og taka þátt í sprengju- og skotárásum, jafnvel eftir að þeir gerðust uppljóstrarar, en sættu aldrei ábyrgð þar sem þeir voru undir verndarvæng leyniþjónustunnar.

Meðal þeirra sem nutu góðs af þessu fyrirkomulagi var Gary Haggarty sem játaði nýlega á sig meira en 500 glæpi á 16 ára tímabili þegar hann var uppljóstrari. Hann viðurkenndi meðal annars fimm morð, fimm morðsamsæri, nokkrar íkveikjur, mannrán og tugi líkamsárása. Hann var dæmdur í rúmlega sex ára fangelsi í janúar.

Breskir fjölmiðlar hafa einnig sagt frá máli Freddie Scappaticci, sem var að sögn yfirmaður innri öryggisgæslu írska lýðveldishersins á sama tíma og hann vann fyrir bresku leyniþjónustuna. Hann hafði að sögn yfirumsjón með því að fletta ofan af öðrum uppljóstrurum og myrða þá.

Þá hefur verið greint frá því að lögfræðingurinn Pat Finucane, sem var myrtur í Belfast árið 1989, hafi verið fórnarlamb manns sem ekki var ákærður vegna starfa sinna fyrir leyniþjónustuna. Lögreglumaður sem rannsakaði morðið segir að hann hafi fengið heimsókn frá yfirboðara sínum sem hafi skoðað myndir af vettvangi glæpsins og svo sagt sér að kafa ekki dýpra í málið.