Barn búsett á heimili þar sem lagt var hald á töluvert magn fíkniefna

Lögreglan á höfuðborgarsvæðinu hefur að undanförnu stöðvað kannabisræktun á nokkrum stöðum í Reykjavík og Kópavogi og hafa samtals fjórir verið handteknir í tengslum við málin. Í einu tilvikinu, þar sem lagt var hald á talsvert magn af fíkniefnum, var barn búsett á heimilinu. Þetta kemur fram í tilkynningu frá lögreglunni á höfuðborgarsvæðinu.

Í öllum tilvikum var um að ræða íbúðir í fjölbýlishúsum en einn húsráðenda á þessum stöðum var sömuleiðis með fíkniefni í geymslu í kjallara hússins. Í einni íbúðanna var að finna um 50 kannabisplöntur, 2 kg af kannabisefnum og 60 gr. af amfetamíni.

Í annarri var lagt hald á talsvert magn af kókaíni, amfetamíni og MDMA, auk nokkurra tuga kannabisplantna, en barn var búsett á heimilinu og voru fulltrúar barnaverndaryfirvalda kallaðir til vegna málsins.

Í þriðju íbúðinni var líka að finna nokkra tugi kannabisplantna sem og allnokkuð af tilbúnu kannabisefni. Svipað átti við um fjórða vettvanginn en þar innandyra var að finna rúmlega eitt kíló af kannabisefnum. Efnin voru afrakstur kannabisræktunar, sem hafði verið klippt niður nokkrum dögum fyrir heimsókn lögreglu.

Húsleitirnar voru framkvæmdar í Reykjavík og Kópavogi og var einn handtekinn á hverjum stað.

Málin, sem eru óskyld, teljast öll upplýst, en þrír mannanna sem komu við sögu í þeim eru á fertugsaldri. Fjórði maðurinn sem var handtekinn í þessum aðgerðum lögreglu er á sextugsaldri.

Þá minnir lögregla á upplýsingasíma sinn, 800 5005, en í hann má hringja nafnlaust til að koma á framfæri upplýsingum um skipulagða brotastarfsemi eða önnur brot sem fólk hefur vitneskju um. Ábendingum um brot má jafnframt koma á framfæri í einkaskilaboðum á fésbókarsíðu Lögreglunnar á höfuðborgarsvæðinu.