Guðlaugur Victor spilaði allan leikinn í jafntefli

Guðlaugur Victor Pálsson spilaði allan leikinn í vörn Zurich er liðið gerði 1-1 jafntefli við Grasshopper í svissnesku deildinni í dag.

 

Guðlaugur og félagar byrjuðu leikinn betur og náðu forystunni á 27. mínútu með marki frá Raphael Dwamena og þannig var staðan í hálfleiknum.

 

Í seinni hálfleiknum sóttu liðsmenn Grasshopper í sig veðrið og jöfnuðu leikinn á 58. mínútu með marki frá Kenan Kodro.

 

Hvorugu liðinu tókst að skora sigurmarkið og því voru lokatölur 1-1. Guðlaugur spilaði allan leikinn fyrir Zurich sem situr nú í fjórða sæti deildarinnar með 40 stig.

 

Guðlaugur er auðvitað einn af þeim Íslendingum sem eru í harðri baráttu um að komast í landsliðshóp Heimis Hallgrímssonar fyrir HM í sumar, en hann velur hópinn í maí.