Segir það hættuspil að setja Áslaugu og Kjartan til hliðar

Fulltrúaráð Sjálfstæðisflokksins í Reykjavík kemur saman á fimmtudag og verður listi uppstillingarnefndar borinn upp til samþykkis. Líkt og greint hefur verið frá mun Eyþór Arnalds leiða listann eftir yfirburðarsigur í leiðtogaprófkjöri flokksins í janúar en heimildir fréttastofu herma að Hildur Björnsdóttir lögfræðingur muni verma annað sætið hljóti listi uppstillingarnefndar brautargengi.

Þá hefur fréttastofa einnig heimildir fyrir því að borgarfulltrúarnir Kjartan Magnússon og Áslaug Friðriksdóttir verði ekki á lista flokksins fyrir komandi kosningar.

Sjá einnig: „Vilja Hildi Björnsdóttur við hlið Eyþórs“

Grétar Þór Eyþórsson, prófessor í stjórnmálafræði við Háskólann á Akureyri, segir það mögulega hættuspil fyrir flokkinn ef þau hafi verið sett óviljug til hliðar.

„Það fer auðvitað eftir því á hvaða forsendum þau eru ekki með á listanum,“ segir Grétar. „Ef að þau stigu sjálfviljug til hliðar þarf þetta ekki að þýða svo mikið en hafi þau verið sniðgengin eða ýtt út með einhverjum hætti getur þetta verið hættuspil fyrir flokkinn ef maður er að horfa til kosninganna.“

Hann segir ljóst að Kjartan og Áslaug hafi bakland í flokknum þrátt fyrir yfirburðasigur Eyþórs í prófkjörinu. Hann segir það áhættusamt að taka sitjandi fulltrúa af listanum en hugsanlega höfði þó ný andlit til nýrra kjósenda. Það fari þó allt eftir því hvernig uppstillingin verður þegar hún lítur dagsins ljós á fimmtudaginn.

„Maður verður að hafa alla fyrirvara á. Maður hefur ekki séð listann ennþá en það er óneitanlega mikil áhætta að vera ekki með tvo sitjandi borgarfulltrúa á meðal þeirra efstu.“