Öryggismál stórefld í Garðabæ: „Heimurinn er orðinn þannig að menn þurfa að verja sig“

Garðabær hefur undirritað samkomulag við lögregluna og höfuðborgarsvæðinu um uppsetningu á öryggismyndavélakerfi í sveitarfélaginu. Gunnar Einarsson, bæjarstjóri Garðabæjar, ræddi verkefnið í Reykjavík síðdegis í dag en þar sagði hann að lögreglan muni taka á móti merkjum úr þessum myndavélum og annast vörslu á gögnum úr þeim samkvæmt gildandi reglum og fyrirmælum frá Persónuvernd.

Innbrotahrina hefur átt sér stað á höfuðborgarsvæðinu frá því í desember og hafa íbúar Garðabæjar orðið fyrir barðinu á henni.

Gunnar sagði að sveitarfélagið hafi sett upp öryggismyndavél á Álftanesi í samstarfi við Neyðarlínuna og hún hafi gefið góða raun. Gunnar sagðist vonast til að þessar öryggismyndavélar muni hafa fælingarmátt en enn á eftir að ákveða staðsetningu og fjölda á þeim.

„Það verður hægt að skoða það mjög vel hvernig umferð og annað er á þeim tíma sem verið er að brjótast hér inn,“ sagði Gunnar. Hann sagði þetta vera öryggismyndavélar sem greina bílnúmer en lögreglan muni ein hafa aðgang að upplýsingum úr þeim og efnið verði ekki skoðað nema eitthvað gerist í bæjarfélaginu sem réttlæti það.

„Innbrot í Garðabæ er bara einu of mikið, eins og annars staðar, og við erum að reyna að taka hart á þessu,“ sagði Gunnar.

Ákall um aukið öryggi

Spurður hvort að almenn sátt væri meðal Garðbæinga með uppsetningu þessara öryggismyndavéla sagðist Gunnar ekki hafa gert könnuna á því en sótt íbúafundi þar sem hann fann fyrir því að kallað væri eftir auknu öryggi.

Hann sagði nágrannavörslu í sveitarfélaginu hafa verið eflda og íbúar hvattir til að fá sér öryggiskerfi á heimili sín.

„Heimurinn er orðinn þannig að menn þurfa að verja sig og við eigum að taka þátt í því og skapa ákveðna öryggiskennd hérna.“

Gunnar sagði mikilvægi slíkra öryggismyndavéla hafa sannað sig í máli Birnu Brjánsdóttur fyrir rúmu ári síðan.

Hann sagði kostnaðinn við uppsetningu vélanna ekki mikinn. Kostnaður við uppsetningu á vélinni á Álftanesi hefði verið um ein og hálf milljón króna með staur og tengingu en vélarnar sjálfar séu ekki svo dýrar.

Hefur heyrt af skipulögðum glæpasamtökum

Spurður nánar út í innbrotahrinuna á höfuðborgarsvæðinu sagðist Gunnar hafa heyrt að um sé að ræða skipulögð glæpasamtök.

„Og að það þyrfti helst að ná þessum gaurum á flugvellinum áður en þeir koma inn í landið. Það eru alltaf ný og ný gengi sem koma, þetta hef ég einhvers staðar frá,“ sagði Gunnar.

Hann sagði mikilvægt að vera á varðbergi og efla löggæsluna enn frekar, slíka innbrotahrinu eigi ekki að líða.

„Ég segi eins og maðurinn sagði á sínum tíma, það þarf bara að berja ofan á hausinn á þeim.“

Lífsgæði að búa við öryggi

Gunnar sagði lögregluna svelta og að ólina hafi verið hert eftir efnahagshrunið árið 2008 en nú þurfi að bæta í.

„Íbúarnir þurfa að hafa ákveðna öryggistilfinningu og lögreglan þarf að vera sýnilegri. Það eru ákveðin lífsgæði að búa við öryggi og þurfa ekki að hafa áhyggjur af því að brotist sé inn í friðsælum hverfum.“