Hrá og hressileg költsýning

Költ-söngleikurinn Rocky Horror verður frumsýndur í Borgarleikhúsinu þann 16. mars. Páll Óskar Hjálmtýsson fer með aðalhutverkið, Frank N Furter, í sýningunni en það verður í annað sinn sem hann bregður sér í hlutverkið. Fyrsti gerði hann það í uppfærslu MH á söngleiknum árið 1991.

Valdimar Guðmundsson ætlar að tækla Eddie en Meatloaf fór með sama hlutverk í kvikmyndinni.

Aðrir leikarar eru Arnar Dan Kristjánsson sem Rocky, Björn Stefánsson fer með hlutverk Riff Raff, Brynhildur Guðjónsdóttir sem Magenta, Haraldur Ari Stefánsson sem Brad Majors, Katla Margrét Þorgeirsdóttir leikur Dr. Scott, Vala Kristín Eiríksdóttir verður Columbia, Valur Freyr Einarsson sögumaðurinn og Þórunn Arna Kristjánsdóttir leikur Janet Weiss.

Með leikstjórn fer Marta Nordal, Jón Ólafsson er tónlistarstjóri, Lee Proud er danshöfundur, Ilmur Stefánsson sér um leikmynd, Filippía Elísdóttir ásamt Elínu Sigríði Gísladóttur sér um búninga og Björn Bergsteinn Guðmundsson um lýsingu. Það er svo Bragi Valdimar Skúlason sem þýðir verkið.

„Þetta gekk hægar en ég bjóst við, mér fannst það svolítið merkilegt,“ segir Bragi aðspurður hvernig honum hafi gengið að koma verkinu yfir á íslensku.

„Þetta er svolítið flókið, þetta verk er náttúrulega að nálgast fimmtugsaldurinn og ýmislegt þarna sem þarf að færa inn í nýja tíma. Þetta er náttúrulega hrátt og hressilegt, það þarf að halda í við það. Svo er hellingur af lögum – það þurfti að finna rímorð í þetta allt saman. Þetta var mjög gaman.“

Forsala á söngleikinn hefst í dag. Fyrstu 500 miðunum sem keyptir verða á staðnum í miðasölu Borgarleikhússins fylgir miði á opna æfingu föstudaginn 23. febrúar og tækifærið til að vera í hópi þeirra fyrstu sem sjá brot úr sýningunni. Þá verður miðinn einnig á sérstökum forsöluafslætti fyrsta daginn hvort sem keypt er á borgarleikhus.is eða í miðasölunni.

Sweet Transvestite

Textabrot úr laginu Sweet Transvestite sem Frank N Furter (Páll Óskar) flytur

Elskurnar mínar

svona sætar og fínar

sá þið hittuð staffið mitt.

Þau eru ekkert of hress

en það er bara vegna þess

þau vantar… stöffið sitt.

Fríkið ekki út

þó að ég svona kjút.

Umbúðirnar augun blekkja.

Ég held aftur af mér

þar til myrkva fer

en þá tekur líka rekkjan að trekkja!

Því ég er djörf og djúsí drusla

frá háhæluðu Transylvaníu — aha!