Stalst til að blása á kertin hjá afmælisstelpum landsliðsins

Hallbera Guðný Gísladóttir er leikreyndasti leikmaður íslenska kvennalandsliðsins í fótbolta í vináttulandsleiknum á móti Noregi sem fera á La Manga á Spáni í þessari viku.

Sara Björk Gunnarsdóttir, fyrirliði íslenska landsliðsins, getur ekki spilað leikinn á Spáni sem þýðir að enginn leikmaður hefur spilað fleiri landsleiki en Skagastelpan sem á að baki 90 A-landsleiki.

Hallbera er kannski farin að hafa sig fullmikið frammi í hópnum ef marka má þessa mynd sem Knattspyrnusambandið birti á samfélagsmiðlum sínum.

Berglind Björg Þorvaldsdóttir og Sandra María Jessen áttu báðar afmæli 18. janúar síðastliðinn og héldu því upp á afmælið sitt í ferðinni. Forráðamenn íslenska landsliðsins redduðu að sjálfsögðu köku í tilefni afmælisins og stelpurnar fengu að blása á kertin.

Berglind Björg og Sandra María spila báðar framarlega á vellinum og treysta á góða hjálp í flottum sendingum fram völlinn frá Hallberu en að þessu sinni var bakvörðurinn öflugi einnig farin að hjálpa þeim að blása á kertin eins og sést hér fyrir neðan.

Tvö afmælisbörn í gær og í dag fengu þær svo sameiginlega afmælisköku eftir kvöldmatinn. Til hamingju með afmælið @berglindbjorg10 og @sandrajessen7 !@HallberaGisla stóðst ekki freistinguna og hjálpaði stelpunum að blása á öll tvö kertin... #fyririsland#dottirpic.twitter.com/xPFrR4et25

— Knattspyrnusambandið (@footballiceland) January 19, 2018

Leikur Íslands og Noregs fer fram annað kvöld og þá væri nú gaman ef Hallbera verði jafn hjálpsöm með góðum sendingum á sóknarmennina tvo eins og hún var að blása á kertin hjá þeim.