Sjúkrasjóðir stéttarfélaga standa ekki undir sér

Sjúkrasjóðir stéttarfélaga eiga erfitt með að ná endum saman og þurfti Bandalag háskólamanna að lækka styrki svo sjóðurinn standi undir sér. Á næsta ári verður farið af stað með viðamikla rannsókn á því hvaða þættir það eru sem valda miklu brotfalli af vinnumarkaði.

Bandalag háskólamanna greindi frá því gær að breyta þurfi úthlutunarreglum hjáþeim því sjúkrasjóður félagsins annar ekki eftir spurn. Nú greiði sjóðurinn sjúkradagpeninga í níu mánuði í stað tólf mánaða. Einnig var heilsustyrkur, gleraugnastyrkur og fleiri styrkir lækkaðir svo sjóðurinn geti náð endum saman.

Ragnar Þór Pétursson, formaður Kennarasambandsins segir stöðuna þar einnig þunga og ljóst að grípa þurfi til aðgerða. Ragnar Þór Ingólfsson, formaður VR útilokar ekki að lækka þurfi greiðslur en þar var tæplega fimmtíu prósent aukning milli ára. Vigdís Jónsdóttir, framkvæmdastjóri VIRK, starfendurhæfingarsjóðs, segir ástandið alvarlegt og til þeirra leiti ungt fólk í auknum mæli sem dottið er út af vinnumarkaði. Vandamálið er því víða og erfitt fyrir sjúkrasjóði að standa undir þessari gífurlegu fjölgun.

Hannes G. Aðstoðarframkvæmdastjóri hjá Samtökum atvinnulífsins tekur undir áhyggjurnar.

„Svona síðastliðin fimmtán ár höfum við séð mikið brottfall af vinnumarkaði vegna langtíma veikinda. Það hefur verið gripið til aðgerða af hálfu samningsaðila með stofnun Virk, starfendurhæfingarsjóðs,“ segir hann en Virk var stofnað árið 2009 sem samvinnuverkefni Alþýðusambands Íslands og Samtaka atvinnulífsins.  En á næsta ári er stefnt á að byrja þriggja ára þróunarverkefni og rannsókn áþví hvaða þættir valda brottfalli af vinnumarkaði. Verður það samstarfsverkefni Virk og heilsugæslunnar.

„Vinnan er þrátt fyrir allt besta meðferðarúrræði fyrir fólk sem á í vandkvæðum. Það er boðið upp á víða í atvinnulífi hlutastörf fyrir fólk með skerta starfsorku. Það má segja að Virk hafi lyft grettistaki í þessum efnum á undanförnum misserum,“ segir hann.