Rannsakaði unga karlmenn sem telja konur skulda sér kynlíf

Hópur karlmanna sem kalla sig Incels, og hafa samskipti í gegnum internetið, telja sig hlunnfarna kynlífi og brýst það út í hatri gegn konum. Þetta eru yfirleitt félagslega einangraðir menn sem sækja stuðning til annarra í svipaðri stöðu. Arnór Steinn Ívarsson rannsakaði orðræðu Incels-samfélagsins.

Róttæki sumarháskólinn stóð fyrir fyrirlestri fyrr í dag þar sem Arnór Steinn hélt erindi upp úr lokaverkefni sínu í félagsfræði um svokallað Incels samfélag sem finna má á internetinu. Incels mætti þýða sem: Skírlífur gegn eigin vilja og telja meðlimir hópsins sig hlunnfarna kynlífi sem brýst út í hatri gagnvart konum. Yfirskriftin var: Konur skulda okkur kynlíf: kvenhatur einhleypra karla á netinu.

„Þeir telja sig fórnarkostnað stefnumótarmenningarinnar. Fallegt fólk fær að hittast og stunda kynlíf, á meðan þeir fá ekki að vera með,” segir Arnór.

Í hópnum fer fram stuðningur og þar þrífst ljót orðræða í garð kvenna. Þrjú ofbeldisverk hafa verið framin í nafni hópsins. Eitt þeirra var framið núna í maí í Toronto, þar sem maður keyrði sendiferðabíl inn í hóp fólks. Hann segir enga svona hópa hér á Íslandi.

„Það er pottþétt að einhverjir á Íslandi hlusti á boðskapinn og hugsi: þetta er góð hugmynd. En það er engin hreyfing hér á landi,” segir hann.

Hann segir hægt að hjálpa öllum með sálrænni meðferð og ráðast þurfi á vandann þar sem hann byrjar

„Incels vandamálið er bara hluti af mikið stærra vandamáli. Sem er klámmenning að eyðileggja upplifun ungs fólks á kynlífi. Þeir vita ekkert hvað kynlíf er. Þeir hafa aldrei upplifað það sjálfir. Það eina sem þeir upplifa af því er bara úr annaðhvort klámi, kvikmyndum eða sjónvarspþáttum. Þeirra hugmyndir um kynlíf eru frekar skrítnar, aukin kynfræðsla í skólum er númer eitt tvö og þrjú að sýna þessum krökkum hvað það er að stunda kynlíf,” segir hann.