Var 10 mínútur að finna um þúsund vændiskonur í Reykjavík

Gjörningalistakonan Elín Signý Ragnarsdóttir sem hefur verið að skoða kynlífsiðnaðinn á Íslandi var aðeins 10 mínútur að finna 952 starfandi vændiskonur í Reykjavík í gegnum internetið. Allar voru þær erlendar.

Til að kanna eftirspurn vændis bjó Elín til aðgang á escort vefsíðu og fékk samdægurs margar beiðnir frá íslenskum karlmönnum. Í kjölfarið skrifaði hún niðurstöður sínar niður á þrjár gínur sem hún staðsetur í Reykjavík og fræðir vegfarendur um málefnið.

„Ég bjóst ekki við að þetta væri svona stór iðnaður hér þannig að ég fór að rannsaka þetta. Þetta er gríðarlega mikið vandamál og stórt vandamál hérna á Íslandi. Mikið af konum sem eru að vinna í þessum geira eru mjög líklega fórnarlömb mannsals.

Gjörningurinn er hluti af listasýningu sem verður til sýnis á Lunga á Seyðisfirði í næstu viku. Auk þess verður til sýnis myndband með viðtölum við vegfarendur um málefnið. „Ég er búin að vera að taka viðtöl við fólk hérna úti á götu og fólk fær alveg sjokk yfir því hvað þetta er mikið á Íslandi. Mjög margir gerðu sér ekki grein fyrir því. Fólk þakkar mér fyrir þetta og sumir fara að gráta þegar þau lesa þetta,“ segir Elín.

Elín valdi kvenkyns gínur til að sýna kvenlíkamann sem oft er hlutgerður í kynlífsiðnaðinum. Hún vonast til að gjörningurinn komi af stað umræðu og aukinni fræðslu.

„Ég held að lögreglan þurfi að hafa fleira starfsfólk sem er að sjá um þessi mál og það þarf meiri pening til að rannsaka þessi mál. Einnig tel ég að það væri mjög gott ef að ungt fólk yrði frætt um þetta í skólum. Um þennan iðnað, hversu skaðlegur hann er og hversu siðlaust það er í rauninni að kaupa vændi og hvað fólk er að styrkja þegar það kaupir vændi. Því að þetta eru oft konur sem eru neyddar í þetta,“ segir hún.