Diego og félagar unnu mikilvægan sigur

Diego Jóhannesson var á sínum stað í byrjunarliði Real Oviedo sem fékk Almeria í heimsókn í spænsku B-deildinni í fótbolta í kvöld.

Gestirnir í Almeria komust yfir í upphafi síðari hálfleiks með marki Fidel Chaves en mörk frá Toche og Saul Berjon tryggðu Diego og félögum mikilvægan sigur.

Diego lék allan leikinn í hægri bakverði.

Real Oviedo komst með sigrinum upp í þriðja sæti deildarinnar en efstu tvö sætin gefa keppnisrétt í La Liga á næsta ári á meðan liðin í 3.-6. sæti fara í umspil um eitt laust sæti. Oviedo er með þremur stigum minna en topplið Huesca.