Þrumur og eldingar er Albert skoraði tvö

Albert Guðmundsson skoraði tvö mörk er Jong PSV rústaði Go Ahead Eagles, 6-0, í hollensku B-deildinni í knattspyrnu í dag.

Nikolai Laursen skoraði tvö mörk með mínútu millibili og kom PSV í 2-0 með mörkum á 9. og 10. mínútu. Sam Lammers bætti við einu marki og staðan 3-0.

Joey Groenbast skoraði svo í eigið mark áður en flautað var til hálfleiks og Albert og félagar í góðum málum og rúmlega það.

Í síðari hálfleikinn var svo komið að Alberti. Hann skoraði af vítapunktinum á 66. mínútu er hann var svellkaldur á vítapunktinum og skoraði svo fallegt mark tíu mínútum fyrir leikslok. Lokatölur 6-0.

Leikurinn var stöðvaður en þrumur og eldingar voru í Eindhoven í kvöld. Albert spilaði allar þær mínútur sem spilaðar voru en leik var hætt á 85. mínútu. Jong PSV er í fjórða sætinu með 58 stig.