Albert með mark og tvær stoðsendingar

Albert Guðmundsson átti stórleik þegar Jong PSV rúllaði yfir Telstar, 6-0, í hollensku B-deildinni í kvöld.

Albert skoraði eitt mark og gaf tvær stoðsendingar fyrir Jong PSV sem er í 7. sæti deildarinnar með 21 stig eftir 14 umferðir.

Albert kom Jong PSV á bragðið á 13. mínútu og þremur mínútum síðar lagði hann annað mark liðsins upp. Donyell Malen skoraði næstu tvö mörk Jong PSV en Albert lagði það seinna upp.

Heimamenn voru 4-0 yfir í hálfleik. Þeir voru öllu rólegri í seinni hálfleik en bættu samt tveimur mörkum við. Lokatölur 6-0, Jong PSV í vil.

Albert, sem skrifaði undir tveggja ára samning við PSV á dögunum, hefur skorað fimm mörk og gefið þrjár stoðsendingar í hollensku B-deildinni á tímabilinu.