Buska fyrsti hundurinn sem fær gangráð: Draumasjúklingur sem spratt á fætur, fékk kæfubita og fór heim

Tíkin Buska varð í gær fyrsti hundurinn á Íslandi til þess að fá hjartagangráð. Þrír læknar af Landspítalanum auk dýralækna af Dýraspítalanum í Garðabæ framkvæmdu aðgerðina, sem gekk vonum framar, og er Buska hressari sem aldrei fyrr í dag.

Spurning um að hrökkva eða stökkva

Buska féll ítrekað í yfirlið vegna hjartveikinnar. Eigandi hennar, Hjörtur Oddsson sem starfar sem sérfræðingur í hjartsláttartruflunum, var ekki tilbúinn til þess að kveðja tíkina, enda er hún aðeins þriggja ára gömul, og fór að kynna sér hvort hægt væri að hjálpa henni. Hjörtur komst að því að það væri svo sannarlega hægt og hafði samband við kollega sína; Gunnar Mýrdal hjartalækni og Felix Valsson hjartasvæfingalækni, og Dýraspítalann í Garðabæ.

Gunnar Mýrdal  segir þetta hafa verið afar sérstaka, en skemmtilega reynslu að fá að taka þátt í svona verkefni. „Hundurinn var svo heppinn að eigandinn og hundapabbinn er sérfræðingur í hjartsláttartruflunum og hundurinn var orðinn verulega slappur. Þriggja ára gömul tík á sínum besta aldri en það var að líða yfir hana og hún var orðin ansi tæp,“ segir Gunnar.

Aðspurður segir hann einkenni hennar þau sömu og hjá mannfólki. „Hún datt bara út eins og gerist hjá mannfólkinu. Nákvæmlega sömu einkenni. Það er engin framtíð í því fyrir hund að vera í sífelldum yfirliðum þannig að það var bara að hrökkva eða stökkva.“

Við hundaheilsu

Gunnar segir Busku hafa staðið sig með prýði í gær. „Hjörtur hringdi í mig í morgun með þær fréttir að hún væri við hesta... eða hundaheilsu eins og maður kannski segir, og hefði brugðist vel við þessu. Komin með góðan hvíldarpúls. [...] Ég hef ekki verið mikið í svona dýraaðgerðum en hún var draumasjúklingur því um leið og hún vaknaði eftir aðgerðina þá spratt hún á fætur, fékk sér kæfubita og fór heim. Hún var ekki að flækja þetta blessunin.“

Gunnar segist að lokum sannfærður um að Buska verði fljót að jafna sig og tekur fram að um sé að ræða yndislegan hund og skemmtilegt verkefni. „Mér fannst þetta mjög skemmtileg og ný reynsla að koma og hjálpa þeim þarna á dýraspítalanum. Ég ætla nú bara að fara og athuga hvort það sé laus staða þarna hjá þeim,“ segir hann léttur í bragði.

Rætt var við Gunnar í Reykjavík síðdegis á Bylgjunni, en hlusta má á viðtalið í spilaranum hér fyrir neðan.