Óttast að landsbyggðin verði skilin eftir í húsnæðis umræðu

Húsnæðismál Ráðherrahópur sem skoða á tillögur til að liðka til og greiða fyrir byggingu lítilla og hagkvæmra íbúða mun fyrst og fremst einbeita sér að þeim vanda sem blasir við á höfuðborgarsvæðinu. Lægri byggingarkostnaður mun samt sem áður hagnast öllum landsmönnum. Þetta er mat Þorsteins Víglundssonar, velferðar- og jafnréttismálaráðherra. „Markmið vinnunnar er að lækka byggingarkostnað á litlum og hagkvæmum íbúðum sem gríðarlegur skortur er á þrátt fyrir mikið umtal síðustu ára. Það mun auðvitað gagnast alls staðar á landinu,“ segir Þorsteinn. „Hins vegar hefur virði fasteigna verið langt undir byggingarkostnaði á stórum svæðum og við þyrftum að skoða þau svæði sérstaklega. Fyrst og fremst munum við beina sjónum okkar að þeim húsnæðisskorti sem er á höfuðborgarsvæðinu.“ Ein af forsendum fyrir kjarasamningum á almennum vinnumarkaði var að bæta húsnæðismarkað sem hefur verið í molum lengi. Hins vegar er víðar skortur á húsnæði en í höfuðborginni en ekki er hagkvæmt að ráðast í byggingu á nýju húsnæði. Aðalsteinn Baldursson, formaður stéttarfélagsins Framsýnar á Húsavík, segir það algjört lykilatriði að landsbyggðin verði ekki skilin eftir. „Nú er þessi fjögurra ráðherra nefnd að koma með tillögur og við verðum að bíða og sjá hvað sá hópur gerir,“ segir Aðalsteinn. „Eygló Harðardóttir, fyrrverandi velferðarráðherra, kom fram með sín frumvörp fyrir kosningar en hugaði aðeins að þeim áskorunum sem steðjuðu að höfuðborgarsvæðinu.“ „Það er engin launung að með því var landsbyggðin skilin eftir og við sættum okkur ekkert við það. Við höfum látið forseta ASÍ vita af því að það kæmi ekki til greina að sætta okkur við slíkt. Hér er um of stórt mál að ræða fyrir okkur.“ - sa