Meirihluti framkvæmdastyrkja fer í bílastæði og göngustíga

610 milljónum var úthlutað úr Framkvæmdasjóði ferðamannastaða í dag. Mikill meirihluti fer í uppbyggingu bílastæða og stíga. Ráðherra ferðamála segir að ef frumvarp um bílastæðagjald á ferðamannastöðum verði samþykkt verði þessi þjónusta sjálfbær.

Alls voru veittir styrkir til 58 verkefna úr framkvæmdasjóði ferðamannastaða. Af þessum verkefnum eru nítján verkefni sem fá meira en tíu milljónir í styrk og snúa að bílastæða- og / eða stígagerð og fá alls 404 milljónir eða tæplega sjötíu prósent heildarfjárhæðar.

„Auðvitað vill maður sjá sem flesta staði sjálfbæra og ferðaþjónustuna sem slíka. En þessir stígar eru náttúruverndarmál, það er verið að traðka niður þessi svæði, þá verða menn að byggja upp og meðal annars vegna þess fengu þessi verkefni styrk," segir Þórdís Kolbrún R. Gylfadóttir, ráðherra ferðamála.

Hún bendir á að ef frumvarp samgönguráðherra um heimildir sveitarstjórna til bílastæðagjalda gangi í gegn muni það breyta stöðunni.

„En þessar umsóknir bárust fyrir þetta frumvarp - þannig að vonandi munu umsóknir og styrkir næstu ára ekki innihalda svona mörg bílastæði, vegna þess að þá verði það alla vega orðið sjálfbært," segir Þórdís.

Í dag fól ráðherra einnig Ferðamálastofu að ganga til samninga við Vegagerðina um þróun á ölduspákerfi vegna Reynisfjöru og Kirkjufjöru. Þá verður hægt að spá fyrir um hættulegar aðstæður, vara við þeim með sýnilegum hætti og mögulega grípa til aukinnar gæslu. Vegagerðin fær tuttugu milljónir til að þróa spákerfi, framkvæma dýptarmælingar og setja upp búnað. Þess er vænst að kerfið verði tekið upp síðar á árinu.