Kynlífsleikföng rjúka út í skammdeginu fyrir jól

Von er á um fjórum tonnum af jóladagatölum fyrir fullorðna um miðjan mánuðinn sem kynlífsleikfangabúðin Blush.is hefur pantað inn á heilum 20 vörubrettum. Verslunin hefur selt nánast öll dagatölin í forpöntun. Innihalda dagatölin 24 litla pakka af unaðs­tækjum ástarlífsins. „Börnin opna sín dagatöl á morgnana en þeir fullorðnu þegar börnin eru sofnuð,“ segir Gerður Huld Arinbjarnardóttir, eigandi Blush.is.

„Það eru ekki bara börnin sem fá jóladagatöl þetta árið. Það hefur færst gríðarlega í aukana að pör geri það líka og kaupi svona kynlífsdagatal og kryddi þannig kynlífið og geri vel við sig í svartasta skammdeginu,“ segir Gerður Huld. „Margir hverjir sjá þarna möguleika á að lífga upp á sambandið þegar sólargangur er sem stystur.“

Sprenging hefur orðið í sölu jóladagatala fyrir fullorðna en verslunin býður nú upp á þetta í annað skiptið. „Þetta er annað árið í röð sem ég býð upp á vöru sem þessa. um síðustu jól seldi ég um 700 jóladagatöl. Nú ákvað ég að panta inn 1.200 stykki, eða um fjögur tonn af jóladagatölum fyrir fullorðna og ég hef nú þegar selt megnið af þeirri pöntun. Þetta eru að ég held um 20 vörubretti af dagatölum sem munu koma til landsins um miðjan mánuðinn,“ segir Gerður.

Sigríður Dögg Arnardóttir, kynfræðingur, segir það skipta miklu máli í jólastressinu að staldra við og rækta sambandið. „Jólin einkennast af eyðslu, hraða og stressi og því er gott að missa ekki sjónar á því hverju við erum að fagna. Því er mjög gott að nýta fjölbreyttar aðferðir til að rækta sambandið. Sumir kaupa dagatöl en aðrir geta byrjað á litlum skrefum, farið í sturtu saman á morgnana og hitt makann í kakóbolla og vöfflu.“

„Það má með sanni segja að það sé töluverð jólavertíð í þessu og mikið að gera hjá okkur að koma öllum þessum vörum á rétta staði,“ segir Gerður Huld. „Þetta er svolítið stórt fyrir lítið fyrirtæki eins og okkur.“