Bubbi skammar Braga fyrir að skamma Geir

Tónlistarmaðurinn landsþekkti Bubbi Morthens lét í sér kveða á Facebook síðu sinni í dag og skammaði textasmiðinn, tónlistarmanninn og sjónvarpsmanninn Braga Valdimar Skúlason fyrir að skamma Geir Þorsteinsson, fyrrverandi formann KSÍ, fyrir málfar Geirs.

Að mati Bubba eru leiðréttingar Braga á málfari Geirs „málfarsfasismi“ og hann segir að slíkir fasistar hafi pönkast á honum frá því hann man eftir sér.

Bubbi segir á Facebook síðu sinni: Geir Þorsteinsson skrifað glataðan pistill um kjör Ólafíu Íþróttamanns ársins og beygði orðið hundrað vitlaust og Bragi Valdimar hankar hann á því ég hef lifað við það frá því ég var barn að vera skriftblindur og málfræði fasistar hafa pönkast á mér frá því ég man eftir mér ef einhverjir hafa reint að taka mig niður þá eru það tækni undur Îslenskunar fólk útum allt lendir í því vera smánað tekið niður vegna þess að það skrifar ekki rétt talar ekki rétt eða vegna þess það getur ekki lesið Geir gerði sjálfan sig að asna með þessu ömurlega komenti en ekki af því hann beygði hundrað vitlaust.

Bubbi lét svo lítið hjarta fylgja færslunni.

Forsaga málsins er sú að Geir var ósáttur við kjör á íþróttamanni ársins og gagnrýndi hann ákvörðunina á Twitter og reiddist yfir því að Ólafía Þórunn Kristinsdóttir hafi verið hlutskörpust í kjöri Samtaka Íþróttafréttamanna. Geir útskýrði síðar mál sitt og sagðist hafa átt von á því að Gylfi Þór Sigurðsson yrði kjörinn íþróttamaður ársins.

Geir ritaði þetta á Twitter: „Þetta gengur ekki lengur - þurfum að velja íþróttamann og íþróttakonu ársins - fá til verksins hundruði aðila sem til þekkja - knattspyrnumaður ekki valinn ÍMÁ 2017 !!“

Eftir Twitter færslu Geirs tjáði Bragi sig um málfar fyrrverandi formanns KSÍ og segir Geir falla á málfræðiprófinu.

Þetta gengur ekki lengur - þurfum að læra að beygja orðið hundrað - það er hundruð ekki hundruði í þolfalli fleirtölu - og það að nota strik í stað punkta er bara mjög furðulegt IMO 2017 !! pic.twitter.com/TcEKDNpVkf

— Bragi Valdimar (@BragiValdimar) December 29, 2017

Bubbi er þó ekki að verja innihald skrifa Geirs enda segir hann að pistill Geirs sé „glataður“ og segir að Geir hafi gert sjálfan sig að asna með ummælum sínum.

Nú er spurning hvort einhver skammi Bubba fyrir að skamma Braga fyrir að skamma Geir.