Ferðamönnum býðst gisting í fólksbílum og tjöldum yfir áramótin

Gisting fyrir ferðamenn í Reykjavík yfir áramótahelgina er nánast uppbókuð. Um tvö prósent af því gistirými sem Airbnb býður upp á er ennþá laust og ekki er mikið úrval af lausum hótelherbergjum á vef Booking.com. Ísland hefur verið vinsæll áfangastaður ferðamanna á áramótunum síðustu ár og virðist það sama vera upp á teningnum í ár.

Þetta kom fyrst fram í frétt Túrista.

Boðið upp á ólöglega gistingu í tjöldum og tjaldvögnum

Magn bíla, tjaldvagna og tjalda sem eru til leigu á Airbnb yfir nýársnótt vekur athygli en ferðamenn sem gista yfir áramótahelgina, 30. desember til 1. desember, í tjaldvagni á höfuðborgarsvæðinu borga um 60.000 krónur fyrir helgina. Þá er einnig hægt að leigja gamla Toyota Corolla með dýnu og tjaldi í skottinu fyrir rúmlega 17.000 krónur.

Skapti Örn Ólafsson, upplýsingafulltrúi Samtaka ferðaþjónustunnar, segir að það sé ólíðandi að ferðamönnum bjóðist gamlir bílar til að gista í. „Þetta ber merki þess að vera kolólöglegt. Það er ólíðandi að ferðamönnum bjóðist gamlir bílar fyrir gistingu. Að menn séu að bjóða upp á tjöld og tjaldvagna yfir harða og kalda vetrarmánuði er náttúrulega eitthvað sem við viljum ekki sjá,“ segir hann.

Þá segir hann nauðsynlegt að tekið sé hart á hlutum sem þessum og eftirlit aukið til muna. „Þarna eru menn ekki að huga að gæðum og öryggi. Þetta sýnir vel hversu óheft útbreiðsla Airbnb er,“ segir Skapti. „Við erum að sjá að það eru á milli fjögur og fimm þúsund einstaklingar sem eru að bjóða upp á gistirými á Airbnb en einungis tæplega þúsund aðilar hafa skráð gistinguna sem heimagistingu. Við viljum sjá hart tekið á svona hlutum.“

Fjölskylduherbergi á 910.000 krónur á Hótel Adam

Hótelherbergi eru mörg hver uppbókuð yfir áramótahelgina og er verðlagið í hærri kantinum. Hótel Adam á Skólavörðustígnum rukkar um 910.000 krónur fyrir fjölskylduherbergi frá 30. desember til 2. janúar. Sjö hótel hafa enn herbergi fyrir fjölskyldur á sama tíma en um tuttugu hótel eru enn með rými fyrir einstaklinga eða pör. Ódýrasta gistingin fyrir fjölskyldu í Reykjavík yfir þessa daga er á 131.000.