Lilja Rafney Magnúsdóttir, þingmaður Vinstri grænna, sýnir því skilning að margir flokksmenn hennar kunni að hafa efasemdir um samstarf við Sjálfstæðisflokkinn. Engu að síður þurfi að sjá hvað viðræðurnar kunni að hafa í för með sér.

Þingflokkur VG ræddi í gærkvöldi hvort hefja ætti formlegar stjórnarmyndurviðræður við Framsókn og Sjálfstæðisflokk. Miklar umræður sköpuðust á fundinum og var honum frest til klukkan til klukkan 13 í dag. Það hafi verið skiljanlegt að mati Lilju.

Sjá einnig: Allt í hnút hjá VG

„Það eru miklar og góðar umræður í þingflokknum og það er nauðsynlegt í svona stóru máli. Það er ekkert að fara á hliðina í þessu þjóðfélagi. Við þurfum bara að vanda okkur vel þannig að það sem kemur út úr þessum viðræðum verði þá eitthvað sem við getum tekið afstöðu til og metið út frá málefnunum. Þess vegna viljum við Vinstri græn vanda okkur vel, við erum málglöð í þingflokknum og tökum okkar tíma,“ sagði Lilja Rafney í Bítinu í morgun.

Aðspurð um hvort það sé hópur innan VG sem vilji alls ekki vinna að meirihlutamyndun með Sjálfstæðisflokknum sagði Lilja að ljóst væri að skiptar skoðanir væru um málið.

„Auðvitað eru margir með ónot í maganum við þessa tilhugsun að fara að vinna með Sjálfstæðisflokknum og skil ég það bara mætavel. Við höfum auðvitað verið á sitthvoru rófinu í stjórnmálum en við höfum líka ábyrgð sem stjórnmálamenn og við gerðum tilraun með þessa fjóra flokka og Framsókn treysti sér ekki lengra í þeim formlegum viðræðum,“ sagði Lilja sem viðurkennir að samstarf með Sjálfstæðisflokknum sé ekki hennar fyrsti valkostur.

Sjá einnig: Katrín segir líkur á góðum samningi

„Ég get alveg verið hreinskilin með það.“ Hún útilokar þó ekkert í þeim efnum enda verði hún að sjá áður hvað er uppi á borðum áður en hún tekur afstöðu. Stjórnmálamenn þurfi að hennar mati að taka ábyrgð, „vinna vinnuna okkar,“ og skoða þá kosti sem eru í stöðunni. „Við sögðum það fyrir kosningar að við útilokuðum ekki neitt og við erum hvorki búin að útiloka þetta eða ganga inn á eitt eða neitt.“

Hún telur niðurstöður kosninganna bera með sér að kjósendur kalli eftir breyttum vinnubrögðum þingmanna. „Það er ekki hægt að vera í þessum skotgröfum endalaust. Við verðum að reyna að vinna þvert á flokka miklu meira heldur en við höfum gert áður og taka tillit til stjórnarandstöðu hverju sinni.“

Í ljósi þess að VG fékk ekki fleiri atkvæði upp úr kjörkössunum þurfi „bara vinna úr þeirri stöðu sem er og taka tillit til allra sjónarmiða í þeim efnum og sjá hvað kemur út úr því. Það er bara hlutverk og skylda okkar sem stjórnmálamenn.“

Viðtalið við Lilju má heyra hér að neðan.