Þristur í hnattflugi lendir í Reykjavík

77 ára gömul flugvél af gerðinni Douglas DC-3 er væntanleg til Reykjavíkur á morgun, laugardag, frá Grænlandi. Flugvélin er í hnattflugi og er henni ætlað að verða sú elsta til að komast umhverfis jörðina. Vélin kom til Narsarsuaq í dag og er áætlað að hún lendi á Reykjavíkurflugvelli klukkan 16 á morgun. 

Flugvélin er merkt svissneska úrafyrirtækinu Breitling. Hún flaug jómfrúarflug sitt 9. mars 1940 og var lengi í eigu bandarískra flugfélaga. Breitling styrkti endurnýjun vélarinnar fyrir tæpum áratug og hefur hún síðan tekið þátt í flugsýningum víða um heim.

Hnattflug Breitling hófst í Genf í mars og er ráðgert að ljúka heimsreisunni eftir þrjár vikur. Vélin flaug fyrst til landa á Balkanskaganum, síðan um Miðausturlönd og Asíu. Síðustu vikur hefur leiðin legið yfir Ameríku.

Íslendingar eiga eina slíka flughæfa vél, sem er Páll Sveinsson, áður Gljáfaxi. Áformað er að íslenski þristurinn heiðri heimsreisu þessarar systurvélar sinnar og er ráðgert að þær fljúgi saman yfir Reykjavík og nágrenni á sunnudag, ef veður leyfir. 

Frá Íslandi er áætlað að Breitling-þristurinn fljúgi á mánudag til Kataness í Skotlandi. Síðan er ráðgert að fljúga suður yfir Bretland með viðkomu í Edinburgh og Manchester og lenda á Farnborough-flugvelli við London þann 2. september.

Vélinni verður síðan flogið milli helstu borga Evrópu, og komið við í París, Frankfurt, Mílanó og Genf áður en heimsreisunni lýkur í Sviss á Breitling Sion-flugsýningunni þann 13. september.

Þristurinn þykir ein markverðasta flugvél flugsögunnar og olli þáttaskilum í farþegaflugi, þar á meðal á Íslandi. Alls voru framleidd um 16 þúsund eintök af DC-3 og hernaðarútgáfunni C-47. Margar vélanna eru enn í notkun í atvinnuskyni, 82 árum eftir að fyrstu eintökin voru smíðuð.