Tveir ungir menn særðir lífshættulega í skotárás í Malmö

Maður hóf skothríð í fjölmennum samkomusal í Malmö í Svíþjóð snemma í morgun. Tveir ungir menn eru sagðir lífshættulega særðir og sá þriðji var fluttur á sjúkrahús minna særður.

Sænska ríkisútvarpið SVT segir að samkomusalurinn sé við Ystad-götu í miðborg Malmö. Þar leigja um tuttugu íþróttafélög og önnur samtök húsnæði af borginni.

Lögreglan er sögð hafa átt erfitt með að átta sig á aðstæðum þegar hana bar fyrst að garði. Þá höfðu tugir manna flúið út úr salnum út á götu. Samkvæmi var í salnum en skotárásin hófst um kl. 6 í morgun að sænskum tíma.

Enginn er enn grunaður um skothríðina, að sögn SVT.

Ofbeldisverk eru sögð tíð á þessum slóðum. Fyrr á þessu ári var ungur maður skotinn þar en sá lifði af.