„Ég get ekki sagt að það komi mér á óvart þetta sjónarmið,“ segir Bjarni Benediktsson forsætisráðherra um grein sem Benedikt Jóhannesson fjármálaráðherra birti í Fréttablaðinu í morgun. Í greininni virðist Benedikt finna íslensku krónunni allt til foráttu og segir hana vera fyrirtækjum og almenningi fjötur um fót. Þá sé það ábyrgð hans sem fjármálaráðherra að benda almenningi á farsælli kosti sem að hans mati er annar miðill en íslenska krónan.

„Eftir kosningar var myndað ríkisstjórnarsamstarf og það var gerður stjórnarsáttmáli þar sem við erum að starfa saman á öðrum grundvelli en hann hefði kannski kosið,“ segir Bjarni og bendir á að í sáttmálanum sé gert ráð fyrir að krónan verði áfram gjaldmiðill Íslands.

„Hinsvegar höfum við ákveðið að taka ramma peningamálastjórnunar til skoðunar og í því starfi sem þegar er komið af stað er gert ráð fyrir því að við verðum áfram með íslensku krónuna en við erum að skoða leiðir til að draga úr sveiflum,“ segir hann.

Bjarni er ekki sammála Benedikt um óágæti íslensku krónunnar. Hún hafi verið þarfur þjónn á réttum tíma.

„Það er hægt að segja það að krónan hafi í raun og veru verið að gegna sínu hlutverki sérstaklega vel. Hún hefur styrkst í samræmi við þann styrk sem íslenska efnahagskerfið hefur verið að sýna. Við höfum öll verið að njóta góðs af því meðal annars með lágri verðbólgu en útflutningsgreinar hafa verið að finna fyrir því. Það er þó eðlilegt vegna þess hve mikill hagvöxtur hefur verið hér og uppgangur að íslenski gjaldmiðillinn styrkist gagnvart öðrum gjaldmiðlum,“ segir Bjarni.