Á þriðja hundrað tóku þátt í flugslysaæfingu á Akureyrarflugvelli

Um 250 manns tóku þátt í umfangsmikilli flugslysaæfingu sem haldin var á Akureyrarflugvelli í dag. Í fréttatilkynningu frá Isavia segir að æfingin í dag hafi verið sviðsett þannig að flugvél með 80 farþega um borð hlekkist á við lendingu á Akureyrarflugvelli og lendir utan brautar, eldar koma upp og margir slasast.

Var vettvangurinn gerður mjög raunverulegur en kveikt var í bílflökum til þess að líkja eftir hlutum úr flugvélarbúk, sjúklingar voru farðaðir og allt gert til þess að gera hann sem líkastan raunverulegu slysi. Æfingin gekk vel en að henni lokinni munu allir þættir hennar verða rýndir og farið yfir þau atriði sem mætti bæta.

„Flugslysaæfingar sem þessar eru haldnar á fjögurra ára fresti á hverjum áætlunarflugvelli á Íslandi og því eru haldnar um 3-4 flugslysaæfingar á landinu á ári hverju. Æfingarnar eru almannavarnaræfingar og eru mikilvægar heildarviðbúnaðarkerfi Íslands hvort sem um flugslys eða önnur hópslys er að ræða,“ segir í tilkynningu Isavia. 

Hér að neðan má sjá myndir frá flugslysaæfingunni.