Meiri afgangur af rekstri ríkissjóðs en áður var ráðgert

Ríkisstjórnin mun leggja sérstaka áherslu á heilbrigðismál í fjármálaáætlun sem kynnt verður í næstu viku. Þetta segir fjármálaráðherra. Gert sé ráð fyrir meiri afgangi af rekstri ríkissjóðs en áður var ráðgert.

Fjármálaáætlun ríkisstjórnarinnar verður kynnt á föstudag en um er að ræða eitt mikilvægasta ef ekki mikilvægasta stefnumál hverrar ríkisstjórnar. Þar kemur í ljós meðal annars hversu mikið fjármagn verður sett í heilbrigðismál, menntamál og samgöngumál á næstu árum. Fjármálaráðherra segir tvennt koma til með að standa upp úr.

„Það verður meiri afgangur heldur en áður, þ.e.a.s. við verðum með 1,6 prósent afgang af því opinbera, þar af 1,5 prósent hjá ríkinu,” segir Benedikt Jóhannesson, fjármála- og efnahagsráðherra.

Hins vegar segir Benedikt að bætt verði við fjármagni í tiltekna málaflokka.

Það hefur verið kallað eftir auknum fjármunum í heilbrigðismálin, menntamálin og samgöngukerfið, svo dæmi séu nefnd. Er von á þeim fjármunum?

„Ja, við getum sagt að það sé von á hluta af þessum fjármunum sem men hefðu gjarnan vilja sjá. Það er kannski fjarstæðan í ríkisfjármálunum núna, að í þessu mikla góðæri sem við höfum að þá er samt aldrei til nægur peningur í allt það sem maður gjarnan vildi gera,” segir Benedikt.

Hann segir ríkisstjórnina leggja sérstaka áherslu á heilbrigðismálin í áætluninni.

„Ég held að það sé reyndar samhljómur um það meðal landsmanna að það eigi að reyna að bæta þar úr eins og mögulegt er. Ég held að það sé mjög mikilvægt, allir sammála um það,” segir Benedikt.

Hann vill ekki segja til um hvort von sé á meira fjármagni í menntamálin, til að mynda háskóla landsins.

Þegar kemur að skuldum ríkissjóðs segir hann að gert sé ráð fyrir hraðri lækkun þeirra.

„Ég held að það séu allir mjög sammála um að nýta þessu góðu ár sem við höfum til að borga niður skuldir. Og við erum þá betur stödd þegar að við lendum aftur í vandræðum einhvern tímann seinna, sem eflaust kemur að,” segir Benedikt.