Fjármálaráðherra flaggar á fyrsta degi haftaleysis

Benedikt Jóhannesson fjármálaráðherra flaggaði í dag í heila stöng og fagnaði þannig fyrsta haftalausa deginum. Forystumenn ríkisstjórnarinnar tilkynntu á sunnudag að fjármagnshöft yrðu afnumin frá og með 14. mars, eða deginum í dag.

Afnám fjármagnshafta þýðir að gjaldeyrishöft á einstaklinga, fyrirtæki og lífeyrissjóði verði afnumin að fullu með nýjum reglum Seðlabanka Íslands um gjaldeyrismál, sem tóku gildi í dag.

Gjaldeyrisviðskipti hafa verið háð takmörkunum frá hruni bankakerfisins árið 2008 en undanfarin misseri hafa verið stigin skref til losunar á þessum takmörkunum.

Benedikt er afar sáttur með þetta skref ríkisstjórnarinnar og birti þessa mynd af íslenska fánanum fyrir utan heimili sitt í Laugardalnum.