Sigmundur Davíð segir stjórnvöld senda kröfuhöfum hættuleg skilaboð

Fyrrverandi forsætisráðherra óttast að stjórnvöld séu að gefa eftir í samskiptum sínum við þá erlendu kröfuhafa sem ekki tóku þátt í útboði Seðlabankans á síðasta ári og þar með senda þau skilaboð að íslensk stjórnvöld gefi eftir ef þeir þráist við. Kröfuhafarnir hafi beitt sér opinberlega fyrir stjórnarskiptum og fengið þau. 

Allt þar til núverandi ríkisstjórn var mynduð heyrði Seðlabankinn undir fjármálaráðuneyti. En eftir að ríkisstjórnin var mynduð var ákveðið að færa málefni bankans undir forsætisráðuneytið.

Sigmundur Davíð Gunnlaugsson segir í sjálfu sér ágætt að Seðlabankinn heyri undir forsætisráðuneytið. Hann undrar sig hins vegar á þeim rökum sem fyrrverandi fjármálaráðherra og núverandi forsætisráðherra færir fyrir þessum breytingum; að það fælust að því er virtist alvarlegir hagsmunaárekstrar í því að hafa bankann undir fjármálaráðuneytinu.

„Og þá spyr maður sig að því hvenær ráðherrann áttaði sig á þessu. Var það áður en hann sjálfur varð fjármálaráðherra, eða var það á meðan hann var fjármálaráðherra og hvernig lýstu þessir árekstrar sér í þeirri tíð,“ spyr Sigmundur Davíð.

Ef að þeir hafa verið á meðan hann var ennþá með þér í ríkisstjórn, heldur þú að hann hafi þá kannski ekki viljað að þú hefðir Seðlabankann undir þér sem forsætisráðherra?

„Það kann vel að vera. Það kann líka vel að vera að hann vilji alls ekki að núverandi  fjármálaráðherra sé með Seðlabankann í sínu ráðuneyti,“ segir forsætisráðherrann fyrrverandi.

Sigmundur óttast hins vegar að þetta sé hluti af því að hverfa eigi frá áætlun allra þessara stofnana frá tíð fyrri ríkisstjórnar um losun hafta. Það eigi að hleypa þeim erlendu kröfuhöfum sem neituðu að vera með í útboði á síðasta ári út á betri kjörum.

„Það virðist vera augljóst. Að minnsta kosti af fréttum Fréttablaðsins, eða Markaðarins, að dæma. Þar kemur fram að allar þessar stofnanir, eða ráðuneytin og Seðlabankinn, séu búin að vera í samskiptum við þessa aðila. Með það að markmiði að semja um það að losa þá fyrr en ella. Þá hlýtur það að teljast hættulegt fordæmi,“ segir Sigmundur Davíð.

Kröfuhafar vildu og fengu stjórnarskipti

Þessum aðilum hafi verið gert grein fyrir því í fyrra að þeir færu síðastir úr höftum yrðu þeir ekki með í útboði Seðlabankans þá.

„Það er ekki hægt annað fyrir þá en líta á það sem eftirgjöf. Þeir eru með þessu að ná fram því sem þeir ætluðu sér. Þeir hafa lýst því yfir að þeir vildu stjórnarskipti. Við sáum að þeir skiptu sér af kosningabaráttunni opinberlega með auglýsingum. En svo vitum við ekki að öllu leyti hversu langt þeir gengu á bakvið tjöldin. Allt til að ná fram þessari stefnubreytingu hjá stjórnvöldum sem stefnir nú í að þeir nái,“ segir Sigmundur Davíð.

Samkvæmt fréttum Fréttablaðsins sé nú verið að bjóða þessum aðilum betra gengi en þeir hefðu fengið hjá Seðlabankanum í fyrra.

Þannig að skilaboðin eru að það borgi sig að þráast við í samskiptum við íslensk stjórnvöld?

„Skilaboðin eru akkúrat þau að það borgi sig að þráast við. Að íslensk stjórnvöld gefi eftir á endanum og aðferðir eins og þessir aðilar beita vikri á Íslandi,“ segir Sigmundur Davíð.

Bjarni Benediktsson forsætisráðherra sagði í svari til Sigmundar Davíðs á Alþingi í dag að hann stefndi að því að lyfta upp hlutverki forsætisráðuneytisins í hagstjórninni. Því væri ekki óeðlilegt að bankinn heyrði undir hans ráðuneyti eins og svo oft áður. Fyrri áætlunum hafi verið fylgt um afnám hafta.

„Við ætlum ekki að fórna neinu til þess að gera þessum aðilum mögulegt að komast út úr landinu með sínar eignir ef það þýðir á einhvern hátt að eftir sitji allur almenningur, fyrirtækin í þessu landi, sveitarstjórnir og aðirir, lífeyrissjóðir í höftum með einhvern vanda,“ segir forsætisráðherra.