Blái naglinn fundaði með forseta um rannsóknir

Jóhannes Reynisson, forsvarsmaður Bláa naglans, hitti Guðna Th. Jóhannesson, forseta Íslands, í vikunni þar sem þeir ræddu um framfarir í krabbameinsrannsóknum og stofnun styrktarsjóðs fyrir grunnrannsóknir á krabbameini. Sjóðurinn verður stofnaður þann 27. mars, og gerðist Guðni stofnfélagi að sjóðnum sem verður í samstarfi við krabbameinslækna, vísindasamfélagið og líknarfélög svo nokkur dæmi séu tekin.

Með sjóðnum vill Jóhannes koma með nýja nálgun í krabbameinsrannsóknir og stöðva krabbamein í fæðingu með svokallaðri snemm-greiningu. „Ég vil að einstaklingur komi reglulega og kerfisbundið á fimm ára fresti til rannsókna á DNA og RNA frá tvítugsaldri.

Það eru ótal vinklar í þessu en þetta er ný nálgun og ávinningurinn er gríðarlegur.“ Hægt er að gerast stofnfélagi í gegnum vefsíðuna Blái naglinn. 

Fréttin birtist fyrst í Fréttablaðinu