Fyrstu bæklunaraðgerðirnar á einkastofu framkvæmdar fyrir 1,2 milljón króna

Í fréttum Stöðvar 2 í gær sagði Ágústa Baldvinsdóttir frá þeirri raun að þurfa að bíða eftir mjaðmaliðaaðgerð en biðin er átta til fjórtán mánuðir á Landspítalanum.

„Þetta snýst ekki bara um mig. Hvað með alla hina? Seinnipart árs í fyrra voru fjögur hundruð á listanum sem biðu eftir aðgerð," sagði Ágústa meðal annars í gær.

En Ágústa er lánsöm. Hún segir góðhjartaðan mann hafa boðist til að borga fyrir hana aðgerð á Klíníkinni en aðgerðin kostar ríflega milljón, eða nákvæmlega 1.158.462 krónur.

Um miðjan janúar fékk Klíníkin leyfi Embættis Landlæknis að framkvæma allar stærri aðgerðir sem ekki krefjast innlagnar á gjörgæslu, meðal annars bæklunaraðgerðir en sjúklingar þurfa að liggja inni eftir aðgerðina. Klíníkin er fyrsta einkastofan hér á landi til að fá slíkt leyfi.

Tvær liðskiptaaðgerðir hafa verið gerðar og fimm aðgerðir eru fyrirhugaðar í næstu viku. Svo verða aðgerðir framkvæmdar eftir þörf.

„Það er mikil þörf í samfélaginu og margir örvæntingarfullir og eiga erfitt með að fá svör um hvenær er komið að þeim. Það sem ég heyri frá sjúklingum eru mismunandi svör, átta til fjórtán mánuðir," segir Hjálmar Þorsteinsson bæklunarskurðlæknir og framkvæmdastjóri Klíníkarinnar.

Í dag geta sjúklingar sótt rétt sinn samkvæmt Evróputilskipun, ef biðtíminn er óeðlilega langur, og farið til útlanda, til dæmis Svíþjoðar í aðgerð. Síðan fengið endurgreiddan kostnaðinn frá Sjúkratryggingum Íslands. Hjálmar segir endurgreiðsluna vera um það bil helmingi hærri en kostnaðinn við aðgerðina hjá Klíníkinni. Fyrir utan það að það sé ekki á færi allra sjúklinga að leggja á sig slíkt ferðalag.

„Öll önnur lönd hafa leyst þennan vanda með því að skapa þjónustusamninga innanlands til að tryggja að sjúklingar komist að innan eðlilegs biðtíma í heilbrigðiskerfinu. Til að grípa einstaklinginn ef biðtíminn er orðinn óeðiliega langur. Ef það er eðlilegur biðtími þá er ekki þörf fyrir þjónustusamninginn en við erum þar í dag," segir hann.

Komið hefur fram að Óttarr Proppé heilbrigðisráðherra sé nú að skoða hvort það verði gerður þjónustusamningur við Klíníkina, það er, hvort sjúkratryggingar greiði niður kostnað sjúklinga. En eins og staðan er í dag þá hefur íslenskt heilbrigðiskerfi færst nær tvöföldu kerfi - þeir sem geta reitt fram háar fjárhæðir komast strax í aðgerð á meðan aðrir þurfi að bíða í ár.

„Það er að sjálfsögðu pólitísk ákvörðun að tryggja jafnt aðgengi. Ein mikilvægustu gæði einstaklingsins er öruggt aðgengi að heilbrigðisþjónustu. Það er brotalöm í dag í kerfinu. Við þurfum að hjálpast að. Við erum engir andstæðingar kerfisins á nokkurn hátt. Við viljum vera með og hjálpa til því þörfin er til staðar," segir Hjálmar.

Ekki náðist í stjórnendur Landspítalans við vinnslu fréttarinnar.