Atli Fannar vann Stærðfræðikeppni framhaldsskólanema

Atli Fannar Franklín, nemandi við Menntaskólann á Akureyri, bar sigur úr býtum í Stærðfræðikeppni framhaldsskólanema sem fram fór á laugardag.

Til keppni mættu 34 nemendur en Atli Fannar hlaut 50 stig af 60 mögulegum. Í öðru sæti var Hrólfur Eyjólfsson, nemandi við Menntaskólann í Reykjavík, með 46 stig og hnífjafnir í þriðja til fjórða sæti með 44 stig voru þeir Garðar Sigurðarson og Guðjón Helgi Auðunsson úr Menntaskólanum í Reykjavík.

Í tilkynningu frá aðstandendum keppninnar segir að nemendur í sautján efstu sætunum munu taka þátt í Norrænu stærðfræðikeppninni fyrir Íslands hönd þann 3. apríl næstkomandi.

„Þeir Garðar og Guðjón Helgi eiga afmæli of snemma á árinu til að geta tekið þátt í Ólympíukeppninni en þeim Atla Fannari, Hrólfi og Elvari Wang Atlasyni, sem vermdi 5. sætið, hefur þegar verið boðið að taka sæti í sex manna liði Íslands fyrir Ólympíukeppni í stærðfræði sem fram mun fara í Río de Janeiro í Brasilíu í sumar. Hvaða þrír nemendur til viðbótar bætast í sex manna lið Íslands mun ráðast að lokinni Norrænu keppninni.

Úrslit voru tilkynnt í verðlaunahófi í Háskólanum í Reykjavík sunnudaginn 5. mars. Farið var yfir stærðfræðikeppnisárið og viðurkenningar afhentar, en efstu keppendur hlutu auk þess peningaverðlaun; 50 þúsund fyrir 1. sæti, 30 þúsund fyrir 2. sæti og 20 þúsund fyrir 3. sæti.

Keppnin er undirbúin í sjálfboðaliðastarfi nefndar á vegum Stærðfræðafélags Íslands og Félags raungreinakennara og fyrir úrslitakeppnina lagði Háskólinn í Reykjavík til húsnæði og kaffiveitingar. Alls 377 nemendur víðs vegar af landinu úr 24 framhaldsskólum tóku þátt í forkeppninni í ár, en þeim rétt rúmlega fjörutíu sem bestum árangri náðu þá var boðið til leiks í úrslitum. Hafa þeir nemendur fengið send æfingardæmi í vetur, til undirbúnings fyrir úrslitarimmuna.

Lokakeppnin samanstóð af sex verkefnum sem nemendur fengu fjóra tíma til að glíma við. Bestum árangri náðu þau í dæmi 1 og 3 en dæmi 3 var á þessa leið: Andri Dagur og Björt Nótt sitja við venjulegt skákborð. Neðst í vinstra horninu stendur einn hrókur. Þau skiptast á og skulu í hverjum leik færa hrókinn á annan reit eins langt og þau vilja fyrir ofan eða til hægri við reitinn sem hann stendur á. Spilið endar þegar hrókurinn er kominn efst í hægra hornið. Andri byrjar. Ef það að koma hróknum efst í hægra hornið markar: a) sigur b) tap; hvort þeirra á þá, í hvoru tilviki um sig, örugga vinningsleið?. Vitanlega þurfti rökstuðningur að fylgja svarinu.

Í efstu 17 sætunum voru eftirfarandi nemendur sem taka munu þátt í Norrænu stærðfræðikeppninni í byrjun apríl:

1. Atli Fannar Franklín (MA)

2. Hrólfur Eyjólfsson (MR)

3.-4. Guðjón Helgi Auðunsson (MR)

3.-4. Garðar Sigurðarson (MR)

5. Elvar Wang Atlason (MR)

6.-7. Breki Pálsson (MR)

6.-7. Sindri Unnsteinsson (MA)

8. Ásmundur Óskar Ásmundsson (MR)

9.-10. Sindri Magnússon (MR)

9.-10. Sveinn Þráinn Guðmundsson (MR)

11. Brynjar Ingimarsson (MA)

12. Þórður Ágústsson(MR)

13.-14. Davíð Phuong Xuan Nguyen(MR)

13.-14. Erla Sigríður Sigurðardóttir (MA)

15. Ari Páll Agnarsson (MR)

16. Magnús Konráð Sigurðsson (MR)

17. Valgeir Sigurðsson (BHS)